रोहा, ता. २१ (बातमीदार) ः आठवडाभरापूर्वी रोहे तालुक्यात ढगफुटीसदृश पाऊस झाला. डोंगरमाथ्यावरून आलेल्‍या चिखलयुक्‍त पाण्यामुळे परिसरातील कालवे तुडुंब भरून वाहत होते. काही ठिकाणी लोकवस्‍तीत पाणी शिरल्याची घटना घडली. तालुक्यातील देवकान्हे धानकान्हे गावातील कालव्यावरील साकव वाहून गेल्‍याने ग्रामस्‍थांचा वर्दळीचा मार्ग बंद झाला आहे. त्याची लवकरात लवकर डागडुजी करण्यात यावी, अशी मागणी ग्रामस्थांकडून करण्यात येत आहे.
तालुक्यातील कुंडलिका नदीपात्रातून तसेच डोलवहाळ सिंचनातून बारमाही वाहणारा कोलाड पाटबंधारे विभागाच्या उजवा तीर कालव्याची दुरुस्ती अनेक वर्षे सुरू आहे. या कालव्यावर काही ठिकाणी नवीन साकव बांधण्यात आले आहे. पाटबंधारे विभागाच्या वतीने देवकान्हे-धानकान्हे गावात आदिवासी वाडीकडे जाण्यासाठी साकव बांधला होता, मात्र निकृष्‍ट कामामुळे पहिल्‍याच पावसात तो वाहून गेल्‍याने ग्रामस्‍थांमधून संताप व्यक्‍त होत आहे.

नवीन पुलाची मागणी
सध्या तालुक्‍यात खरिपाची भातलागवड सुरू आहे. आदिवासी नागरिक मोलमजुरी करण्यासाठी याच छोट्या पुलावरून ये-जा करतात, मात्र कालव्यातील साकव कोसळल्याने मार्गक्रमण होताना त्‍यांची गैरसोय होत आहे. पाटबंधारे विभागाने याबाबत दखल घेऊन लवकरात लवकर नवीन साकव उभारावा, अशी मागणी ग्रामस्थांकडून होत आहे.

रोहा ः देवकान्हे-धानकान्हे गावातील साकव पहिल्‍याच पावसात वाहून गेला.

..........