अल्पवयीन मुलीचा गर्भपात उघडकीस
पनवेलमधील घटना; तरुणासह तिघांविरुद्ध गुन्हा
पनवेल, ता. २१ (वार्ताहर) : समाजमाध्यमावरून ओळख झालेल्या १७ वर्षीय मुलीवर बलात्कार करून तिचा गर्भपात केल्याचा धक्कादायक प्रकार पनवेल परिसरात उघडकीस आला आहे. याप्रकरणी खान्देश्‍वर पोलिसांनी १८ वर्षीय आरोपीवर बलात्कारासह पोक्सोनुसार गुन्हा दाखल केला आहे. तसेच गर्भपात करण्यात सहभाग असलेली आरोपीची आई आणि अन्य दोन नातेवाइकांना सहआरोपी करण्यात आले आहे.

आरोपी आणि पीडित मुलगी यांची दोन वर्षांपूर्वीच इन्स्टाग्रामवर मैत्री झाली होती. मुलगी अल्पवयीन असल्याचे माहीत असूनही आरोपीने लग्नाच्या भूलथापा देऊन तिला आपल्या घरी बोलावून तिच्याशी अनेक वेळा शारीरिक संबंध प्रस्थापित केले. त्यामुळे ही मुलगी गरोदर राहिली. तिने हे बंटीला सांगताच त्याने खोटे बोलून तिचा विश्वास संपादन केला. त्यानंतर आरोपीच्या आईने मे महिन्यात या मुलीला त्यांच्या मूळ गावी नांदेड येथे पाठवले.
तेथे आरोपीच्या दोन मावशांनी पीडित मुलीचा नांदेड येथील एका रुग्णालयात जबरदस्तीने गर्भपात करून घेतला. त्यानंतर तिला पुन्हा तिच्या घरी आणून सोडण्यात आले. गत आठवड्यात आपल्या मुलीचा गर्भपात झाल्याचे तिच्या आईला समजले. तिने याबाबत खांदेश्वर पोलिस ठाण्यात तक्रार दाखल केली. त्यानुसार पोलिसांनी आरोपी आणि त्याची आई आणि दोन मावशांविरोधात गुन्हा दाखल केला आहे. या गुन्ह्यात अद्याप कुणालाही अटक करण्यात आली नसल्याची माहिती पोलिसांनी दिली.