गावठी पिस्तूल,जिवंत काडतूससह तरुणाला अटक
भिवंडी, ता. २२ (वार्ताहर): शांतीनगर परिसरात गावठी पिस्तूल व दोन जिवंत काडतूस बाळगणाऱ्या २९ वर्षीय तरुणाला भिवंडी गुन्हे शाखेने अटक केली आहे. मोसीन मेहबुब खान (रा. कसाईवाडा, दुसरा निजामपूरा) असे अटक केलेल्या तरुणाचे नाव आहे. गुन्हे शाखेला मिळालेल्या गुप्त माहितीच्या आधारे, नागाव येथील वकार अन्सारी यांच्या गोडाऊनसमोरील सार्वजनिक रस्त्यावर एक संशयित व्यक्ती अग्निशस्त्र घेऊन येणार असल्याचे कळताच, सोमवारी रात्री साडेआठच्या सुमारास वरिष्ठ पोलीस निरीक्षक जनार्दन सोनवणे यांच्या मार्गदर्शनाखाली पथकाने सापळा रचला. संशयित मोसीन खान घटनास्थळी दाखल होताच पोलिसांनी त्याला ताब्यात घेतले. झडतीदरम्यान त्याच्याकडे ३० हजार ६०० रुपये किमतीचे गावठी बनावटीचे पिस्तूल व दोन जिवंत पितळी काडतुसे सापडली. त्याच्यावर शांतीनगर पोलीस ठाण्यात गुन्हा दाखल केला आहे. या गुन्ह्याचा पुढील तपास गुन्हे शाखेचे पोलीस उपनिरीक्षक रवींद्र शिंदे करत आहेत.