बेलापूरमध्ये अनधिकृत बांधकामावर पालिकेची कारवाई
वाशी, ता. २२ (बातमीदार) ः बेलापूर सेक्टर १४ येथील दिवाळे गावातील अनधिकृत बांधकामांवर महापालिकेच्या माध्यमातून कारवाई करण्यात आली आहे.
येथील घर क्रमांक १३४४ व १३५३ या ठिकाणी सुरेश कोळी, बाळकृष्ण कोळी तसेच अशोक कोळी यांच्याकडून अनधिकृत बांधकाम करण्यात येत होते. या अनधिकृत बांधकामांस ए विभाग बेलापूर कार्यालयामार्फत एमआरटीपी कलम ५४ अन्वये नोटीस बजावण्यात आलेली होती. त्याअनुषंगाने संबंधितांनी अनधिकृत बांधकाम स्वत:हून हटविणे आवश्यक होते, परंतु त्यांनी अनधिकृत बांधकाम सुरूच ठेवले होते. त्यामुळे नवी मुंबई महापालिकेच्या अतिक्रमण नियंत्रण विभागाच्या वतीने नोटीस देऊनही संबंधितांनी नोटिशीची दखल न घेतल्यामुळे कारवाई करण्यात आली. ही कारवाई नवी मुंबई महापालिका विभागामार्फत आयुक्त डॉ. कैलास शिंदे यांच्या निर्देशानुसार व अतिरिक्त आयुक्त डॉ. राहुल गेठे व उपआयुक्त (अतिक्रमण) डॉ. कैलास गायकवाड यांच्या मार्गदर्शनाखाली अतिक्रमण नियंत्रण विभागाने बेलापूर येथे केली. या धडक मोहिमेसाठी ए विभाग कार्यालयाचे सहाय्यक आयुक्त तथा विभाग अधिकारी डॉ. अमोल पालवे, सहाय्यक अभियंता आत्माराम काळे तसेच बेलापूर विभागातील अधिकारी, कर्मचारी, मजूर १०, हॅमर दोन, गॅसकटर दोन तसेच अतिक्रमण नियंत्रण विभागाकडील पोलिस तैनात होते.