चेंबूर पोलिसांनी ६५ मोबाईल दिले परत
चेंबूर, ता. २२ (बातमीदार) : चेंबूर पोलिसांनी तब्बल ६५ फोन नागरिकांना सोमवारी (ता. २१) परत केले. हरविलेले व चोरीला गेलेले मोबाईल फोन परत मिळाल्याने नागरिकांनी पोलिसांचे आभार मानले.
हरवलेल्या मोबाईल फोनचा शोध घेण्याकरिता सीईआयआर पोर्टलच्या माहितीच्या आधारे तांत्रिक कौशल्याचा वापर करून चेंबूर परिमंडळ सहाचे पोलिस उपायुक्त समीर शेख, चेंबूर विभागाचे सहाय्यक पोलिस आयुक्त रामराव ढिकले, चेंबूर पोलिस ठाण्याचे वरिष्ठ पोलिस निरीक्षक सदानंद राणे, पोलिस निरीक्षक (गुन्हे)चे मनीष आवळे, (का.व.सु.) सहाय्यक पोलिस निरीक्षकाचे दीपक साळुंखे यांच्या मार्गदर्शनाखाली चेंबूर पोलिस ठाणे येथील सायबर पथकाने हरवलेल्या मोबाईलच्या गुन्ह्याचा पाठपुरावा करून सर्व मोबाईल वापरकर्त्यांचा शोध घेतला.
मुंबई, गुजरात, उत्तर प्रदेश, झारखंड, बिहार, पश्चिम बंगाल, राजस्थान, केरळ, कर्नाटक अशा विविध राज्यांतून हस्तगत झालेले, चोरीला गेलेले व गहाळ झालेले बरेचसे मोबाईल विविध राज्यांत वापरात असल्याचे पोलिसांच्या लक्षात आले. त्यानंतर स्थानिक पोलिसांच्या मदतीने मोबाईल फोन हस्तगत केले.