कल्याणमध्ये तरुणीला बेदम मारहाण

सकाळ वृत्तसेवा
डोंबिवली, ता. २२ ः नांदिवली येथील एका क्लिनिकमध्ये डॉक्टरांच्या केबिनमध्ये घुसणाऱ्या तरुणाला ‘आत जाऊ नका, आत इतर लोक आहेत,’ असे सांगताच त्याने २५ वर्षीय तरुणीला बेदम मारहाण केल्याची घटना सोमवारी (ता. २१) सायंकाळी घडली.
गोकुळ झा असे मारहाण करणाऱ्या तरुणाचे नाव आहे. याप्रकरणी पीडित तरुणीने दिलेल्या तक्रारीवरून मानपाडा पोलिस ठाण्यात गोकुळ झा याच्याविरोधात गुन्हा दाखल करण्यात आला आहे. कल्याणमधील पिसवली गावात पीडित तरुणी राहण्यास आहे. नांदिवली येथील संबंधित क्लिनिकमध्ये ती रिसेप्शनिस्ट म्हणून काम करते. पीडित तरुणीने दिलेल्या तक्रारीनुसार, सोमवारी संध्याकाळी एक दाम्पत्य त्यांच्या बाळाला तपासणीसाठी घेऊन क्लिनिकमध्ये आले होते. त्यांच्यासोबत एक २५ वर्षीय मुलगा होता. तो डॉक्टरांच्या केबिनमध्ये घुसायला लागला. तिने त्याला थोडा वेळ थांबायला सांगितल्याने त्याने शिवीगाळ केली. त्यानंतर लाथाबुक्क्यांनी बेदम मारहाण केली. दरम्यान, आरोपीवर कडक कारवाई झाली पाहिजे, पोलिसांनी आरोपीला अटक केली पाहिजे, असे ठाकरे गटाचे जिल्हाप्रमुख दीपेश म्हात्रे यांनी म्हटले आहे.