सागरी जीवसृष्टी रक्षणाचा निर्धार
मुंबईत सात मलजल प्रक्रिया केंद्रांची उभारणी, २०५१ पर्यंतचे नियोजन
सकाळ वृत्तसेवा
मुंबई, ता. २२ ः पर्यावरणाचे हित, समुद्राच्या पाण्याची गुणवत्ता वाढवून सागरी जीवसृष्टीच्या रक्षणासाठी मुंबईत सात मलजल प्रक्रिया केंद्रे उभारण्यात येत आहेत. या केंद्रात दररोज दोन हजार ४६४ दशलक्ष लिटर मलजलावर प्रक्रिया केली जाणार असून, २०५१ पर्यंत वाढणाऱ्या लोकसंख्येचा विचार करूनच पालिका हा प्रकल्प उभारत आहे.
पालिकेच्या या महत्त्वाकांक्षी प्रकल्पांचा आज पाहणी दौरा करण्यात आला. आयुक्त भूषण गगराणी यांच्या मार्गदर्शनाखाली आणि अतिरिक्त महापालिका आयुक्त (प्रकल्प) अभिजित बांगर  यांनी मुंबई मलनिस्सारण प्रकल्पांच्या मुंबई महानगरातील सात ठिकाणी मलजल प्रक्रिया केंद्र उभारण्याच्या कामांची पाहणी केली. या वेळी उपआयुक्त प्रमुख अभियंता (मुंबई मलनिस्सारण प्रकल्प) राजेश ताम्हाणे, उपप्रमुख अभियंता (मुंबई मलनिस्सारण प्रकल्प)  अशोक मेंगडे उपस्थित होते. 
--------------------------------------------
विभाग प्रकल्पांची क्षमता (दशलक्ष लिटर)
वरळी ५००
वांद्रे ३६०
मालाड ४५४
घाटकोपर ३३७
धारावी ४१८
भांडुप २१५
वर्सोवा १८०
---------------------------------------
बायोगॅसपासून वीजनिर्मिती
प्रकल्‍पाअंतर्गत प्राथमिक व दुय्यम प्रक्रियांसह तृतीय स्तरीय प्रक्रियाही केली जाणार आहे. तसेच बाहेर पडणाऱ्या बायोगॅसपासून वीजनिर्मिती केली जाणार आहे. बाहेर पडणाऱ्या गाळावर प्रक्रिया केली जाणार आहे. मलजल प्रक्रिया केंद्र प्रकल्पाची स्थापत्यविषयक प्रारंभिक कामे पूर्ण झाल्याने बांधकामाची स्थापत्य कामे वेगाने सुरू असल्याचे राजेश ताम्हाणे म्हणाले.
-----------------------------------------
वरळी येथील काम ३४ टक्के पूर्ण
- दररोज २४६.४० कोटी लिटर म्हणजे दोन हजार ४६४ दशलक्ष लिटर मलजलावर होणार प्रक्रिया.  
- शहर आणि उपनगराला फायदा.
- प्रक्रिया केंद्राचा शहर आणि पूर्व आणि पश्चिम उपनगराला फायदा.
-------------