अदाणीला वीज वितरण परवाना देण्यास महावितरणचा विरोध
महसूल देणारे ग्राहक गेल्यास क्रॉस सबसिडीवर गदा येणार

सकाळ वृत्तसेवा
मुंबई, ता. २२ : महावितरणच्या कार्यक्षेत्रात समांतर वीज वितरण परवाना मिळावा, म्हणून अदाणी इलेक्ट्रिसिटीने वीज आयोगाकडे केलेल्या याचिकेला आता महावितरणसह वीज कामगार संघटना आणि सामान्य वीज ग्राहकांनी कडाडून विरोध केला. महावितरण सामाजिक आणि ग्राहकहितसमोर ठेवून वर्षानुवर्षे औद्योगिक, वाणिज्य, घरगुती आणि कृषिपंपधारकांच्या वीजदरात समन्वय ठेवून वीज वितरण करीत आहे. मात्र महावितरणच्या कार्यक्षेत्रात एखाद्या खासगी कंपनीला समांतर वीज वितरण परवाना दिल्यास महावितरणने बसवलेली घडी विस्कटण्याची भीती असल्याचे सांगत समांतर परवान्याला विरोध करण्यात येत आहे.
अदाणीला महावितरणचे कार्यक्षेत्र असलेल्या मुलुंड, भांडुप, ठाणे जिल्ह्यातील भाग, नवी मुंबई, पनवेल, खारघर, तळोजा आणि उरण या परिसरात समांतर वीज वितरण परवाना मिळावा म्हणून वीज आयोगाकडे अर्ज केला आहे. त्यावर मंगळवारी (ता. २२) ई-सुनावणी पार पडली. या वेळी महावितरणने जोरदार आक्षेप नोंदवला. महावितरणकडे औद्योगिक ग्राहकांबरोबरच सर्वसामान्य घरगुती वीजग्राहक, कृषिपंपधारक शेतकरी हे ग्राहक आहेत. त्यामुळे महावितरण एका गटातील ग्राहकांकडून मिळणाऱ्या महसुलाचा क्राॅस सबसिडीच्या रूपाने इतर ग्राहकांना लाभ देऊन समतोल राखत आहे. वर्षानुवर्षे सुरू असलेली ही प्रक्रिया महावितरणच्या कार्यक्षेत्रात एखाद्या खासगी कंपनीला समांतर वीज वितरण परवाना दिल्यास ग्राहकांची खेचाखेची होऊन बंद पडू शकते. त्यामुळे समाजहित आणि ग्राहकहित समोर ठेवून असा परवाना आयोगाने जारी करू नये, अशी ठाम भूमिका आज वीज आयोगासमोर मांडली. केवळ शहरी भागात नव्हे तर खेडोपाड्यातही महावितरणने आपले वीज वितरणाचे जाळे पोहोचवले आहे. पण खेड्यातून मिळणारा महसूल कमी आहे. त्यामुळे चांगला महसूल मिळणारे विभाग खासगी कंपन्यांच्या हातात गेल्यास आर्थिक संकट ओढावू शकते, असेही महावितरणे स्पष्ट केले.

‘टोरंट’ची सुनावणी प्रलंबित
महावतिरणचे ग्राहक अचानक कमी झाले तर त्यामध्ये झालेली गुंतवणूक अडचणीत येऊ शकते. तसेच कामगार संघटनांनीही या वेळी समांतर वीज वितरण परवान्याला विरोध केला. दरम्यान, टोरंट पाॅवरने मागितलेल्या समांतर वीज वितरण परवान्यावर वीज आयोगाकडे सुनावणी होणार होती, मात्र ती झालेली नाही.