विद्यार्थ्यावर अत्याचार करणाऱ्या
शिक्षिकेला जामीन मंजूर
सकाळ वृत्तसेवा
मुंबई, ता. २२ ः अल्पवयीन विद्यार्थ्यावर लैंगिक अत्याचार केल्याच्या आरोपात अटकेत असलेल्या मुंबईतील एका नामांकित शाळेतील ४० वर्षीय शिक्षिकेला विशेष पोक्सो न्यायालयाच्या न्यायाधीश सबिना मलिक यांनी मंगळवारी (ता. २२) जामीन मंजूर केला.
शालेय कार्यक्रमादरम्यान डिसेंबर २०२३मध्ये आरोपी शिक्षिका १६ वर्षीय पीडित विद्यार्थ्याकडे आकर्षित झाली. त्यानंतर त्याच्याशी लैंगिक संबंध प्रस्थापित केले. त्यानंतर शिक्षिकेने अनेकदा अल्पवयीन मुलाला आलिशान हॉटेल्समध्ये नेऊन लैंगिक अत्याचार केले. तसेच ती त्यास मद्यपान करण्याची सक्ती करीत होती, असा पोलिसांचा आरोप आहे. त्यानुसार जूनमध्ये शिक्षिकेविरोधात पोक्सो कायद्यासह विविध कलमांखाली गुन्हा दाखल करून अटक केली होती. न्यायालयीन कोठडीत रवानगी झाल्यानंतर शिक्षिकेने जामिनासाठी अर्ज केला होता. जामीन अर्जात शिक्षिकेने आरोपांचे खंडन केले होते. त्यासाठी तिने पीडित मुलाशी व्हॉट्सॲपवर झालेल्या अनेक संभाषणांचा हवाला दिला होता. तसेच एफआयआरमध्ये मुलाचे आपल्याबाबत असलेले वर्तन आणि भावना जाणूनबुजून दडपल्याचा दावाही आरोपी शिक्षिकेने जामिनाची मागणी करताना केला होता.