पालघर, ता. २२ (बातमीदार) : जिल्ह्याचा विकास करण्यासाठी पायाभूत सुविधांना प्राधान्य देणे गरजेचे आहे. आरोग्य, शिक्षण, मूलभूत व पायाभूत सुविधांची कामे प्राधान्याने पूर्ण करा, असे निर्देश पालकमंत्री गणेश नाईक यांनी देत निधी उपलब्ध करून देण्याच्या सर्व संबंधित यंत्रणांना सूचना केल्या.

वनमंत्री तथा पालघर जिल्ह्याचे पालकमंत्री तथा जिल्हा नियोजन समितीचे अध्यक्ष गणेश नाईक यांच्या अध्यक्षतेखाली जिल्हा नियोजन समितीची बैठक जिल्हाधिकारी कार्यालयातील लोकशाहीर आत्माराम पाटील नियोजन समिती सभागृहात सोमवारी (ता. २१) आयाेजित केली हाेती. या बैठकीस खासदार सुरेश म्हात्रे, आमदार ज्ञानेश्वर म्हात्रे, राजेंद्र गावित, दौलत दरोडा, शांताराम मोरे, विलास तरे, विनोद निकोले, हरिश्चंद्र भोये, स्नेहा दुबे-पंडित, राजन नाईक, तसेच जिल्हाधिकारी डॉ. इंदुराणी जाखड, जिल्हा परिषदेचे मुख्य कार्यकारी अधिकारी मनोज रानडे, पोलिस अधीक्षक यतिश देशमुख, डहाणू प्रकल्प अधिकारी विशाल खत्री, जव्हारचे अपूर्वा बासुर, जिल्हा नियोजन अधिकारी प्रशांत भामरे आदी उपस्थित होते.

५ फेब्रुवारी रोजी झालेल्या जिल्हा नियोजन समितीच्या बैठकीच्या इतिवृत्तास मंजुरी देण्यात आली. जिल्हा वार्षिक योजना आदिवासी घटक कार्यक्रम, सर्वसाधारण व विशेष घटक योजना २०२४-२५ च्या अंतिम सुधारित तरतुदीला मान्यता देण्यात आली. आदिवासी उपयोजनांतर्गत १.२१ कोटी व सर्वसाधारण अंतर्गत २.२० कोटी असा एकूण ३.४१ कोटी निधी तांत्रिक अडचणींमुळे प्रत्यार्पित झाला असून, उर्वरित निधी संबंधित यंत्रणांना प्रत्यक्ष कामे करण्याकरिता अदा करण्यात आलेला आहे. जिल्हा वार्षिक योजना आदिवासी घटक कार्यक्रम, सर्वसाधारण व विशेष घटक योजना अंतर्गत जूनअखेरच्या खर्चाचा आढावा घेण्यात आला. एकूण ६८८.५० कोटी निधी अर्थसंकल्पित झाला असून, एकूण ६८५.०९ कोटींचा निधी कार्यान्वयीन यंत्रणांना मंजूर कामाच्या पूर्ततेसाठी निधी अदा करण्यात आलेला आहे. त्यापैकी एकूण ४४४.६४ काेटींचा निधी कामे पूर्ण करून प्रत्यक्ष खर्च करण्यात आलेला आहे. उर्वरित निधीची कामे त्वरित पूर्ण करून निधी १०० टक्के खर्च करण्याबाबत संबंधित यंत्रणांना पालकमंत्री गणेश नाईक यांनी निर्देश दिले.