धावत्या लोकलवर
कोसळले दगडमाती
शहापूर (वार्ताहर) : छत्रपती शिवाजी महाराज टर्मिनसहून (सीएसएमटी) कसाऱ्याकडे निघालेल्या लोकलवर दरडीवरून दगड आणि मातीचा भाग कोसळल्याची घटना मंगळवारी रात्री नऊ वाजण्याच्या सुमारास कसारा रेल्वेस्थानकापूर्वी घडली. या घटनेत दरवाजात उभे असलेले दोन प्रवासी जखमी झाले.
सीएसएमटीहून सायंकाळी ६:२८ वाजता निघालेली कसारा लोकल रात्री साठेआठच्या सुमारास कसाऱ्याला पोहोचणे अपेक्षित होते; मात्र अर्धा तास उशिरा आलेली ही लोकल ८:५८ वाजता कसारा स्थानकात पोहचत असताना दरडीच्या दगड, मातीचा भाग त्यावर कोसळला. या घटनेत जखमी झालेल्या दोघांना रेल्वे सुरक्षा दलातील जवानांनी कसारा प्राथमिक आरोग्य केंद्रात दाखल केले. मागील काही दिवसांपासून सुरू असलेल्या संततधार पावसामुळे दरड कोसळल्याचा अंदाज आहे. दरम्यान, या घटनेमुळे रेल्वेवाहतुकीवर कोणताही परिणाम झाला नसल्याचे सूत्रांनी सांगितले.