वाशीत संविधान अमृतमहोत्सवी कार्यक्रम
नवी मुंबई, ता. २३ (वार्ताहर) ः भारतीय संविधान लागू होऊन ७५ वर्षे पूर्ण होत असल्याच्या अमृतमहोत्सवी वर्षानिमित्त वाशी येथील विष्णूदास भावे नाट्यगृहात शुक्रवारी (ता. २५) सायंकाळी सांस्कृतिक कार्यक्रमाचे आयोजन करण्यात आले आहे. महाराष्ट्रातील विविध कलावंतांनी एकत्र येऊन या कार्यक्रमाचे आयोजन केले असून, प्रमुख पाहुणे म्हणून केंद्रीय राज्यमंत्री रामदास आठवले उपस्थित राहणार आहेत.
या कार्यक्रमात रामदास आठवले यांच्या हस्ते डॉ. कॉ. भारत पाटणकर यांना डॉ. बाबासाहेब आंबेडकर राष्ट्रीय योगदान पुरस्कार प्रदान करण्यात येणार आहे. या कार्यक्रमास विविध क्षेत्रांतील मान्यवरासह रिपाइंचे सरचिटणीस गौतम सोनवणे, राष्ट्रीय समिती सदस्य सुरेश बारशिंग, उपाध्यक्ष सिद्राम ओहोळ, नवी मुंबई रिपाइं अध्यक्ष महेश खरे, सहाय्यक आयुक्त समाधान इंगळे, ॲड. बी. के. बर्वे, विजयराजे ढमाळ, माजी महापौर सुधाकर सोनावणे यांच्यासह इतर अनेक समाजाभिमुख कार्यकर्ते आणि पदाधिकारी उपस्थित राहणार आहेत.