विक्रमगड (बातमीदार) : संत शिरोमणी नामदेव महाराजांचा ६७५ वा समाधी सोहळा बुधवारी (ता. २३) विक्रमगडमधील विठ्ठल-रुख्मिणी मंदिर सभागृहात शिंपी समाजातर्फे मोठ्या भक्तिभावात साजरा झाला. या कार्यक्रमाची सुरुवात वंदना वाडेकर यांच्या मार्गदर्शनाखाली काकड आरतीने झाली. त्यानंतर ह.भ.प. कल्पेश महाराज यांच्या कीर्तनातून नामदेव महाराजांच्या जीवनावर प्रकाश टाकण्यात आला. अभिषेक, हरिपाठ व महाप्रसादाने सोहळा पार पडला. विक्रमगड, वाडा, मोखाडा, जव्हार परिसरातील शिंपी बांधवांसह अन्य समाजबांधव मोठ्या संख्येने उपस्थित होते. आयोजनात उत्कर्ष शिंपी समाज मंडळाचे अध्यक्ष सुशिल औसरकर व पदाधिकाऱ्यांचे विशेष योगदान होते.