भांडुप जलशुद्धीकरण केंद्रात कंत्राटी भरती
पालिकेच्या कामगारांमध्ये असंतोष
सकाळ वृत्तसेवा
मुंबई, ता. २५ : भांडुप जलशुद्धीकरण केंद्रात कंत्राटी कामगारांच्या भरतीमुळे तेथील कायमस्वरूपी कामगारांमध्ये असंतोष निर्माण झाला आहे. अत्यंत संवेदनशील असलेल्या या विभागात कंत्राटी भरती केल्याने या प्रकल्पाच्या सुरक्षिततेला धोका पोहोचण्याची भीती या पालिकेच्या कामगारांनी केली आहे.

मुंबई महापालिकेत खासगीकरणाचे वारे वाहू लागले आहेत. त्यातच आता पालिका प्रशासनाने भांडुप येथील जलशुद्धीकरण केंद्रात विरोध असतानाही कंत्राटी कामगार नेमून मुंबईकरांना पाणीपुरवठा करण्याची जबाबदारी त्यांच्यावर सोपवली आहे. त्यामुळे या कामगार संघटना आक्रमक झाल्या आहेत. मुंबई महापालिकेच्या वतीने सात तलावांतील पाणी उचलण्यात येऊन त्या पाण्यावर शहापूर व भांडुप येथील जलशुद्धीकरण केंद्रात  प्रक्रिया करून त्याचा मुंबईकरांना पुरवठा केला जातो. भांडुप संकुलात ९०० दशलक्ष लिटर पाण्याचे शुद्धीकरण करून ते मुंबईकरांना पुरवले जाते. या जलशुद्धीकरण केंद्रांमध्ये पंपांची देखभाल करण्यासाठी खासगी कंपन्यांची सेवा घेतली जात आहे, त्यालाही कामगार संघटनांनी आक्षेप घेतला आहे. जलशुद्धीकरणासारख्या संवेदनशील विभागामध्येही खासगी कंपनीची सेवा घेतली जात असल्याने या केंद्राची सुरक्षितता धोक्यात आल्याचे म्युनिसिपल कर्मचारी कामगार सेनेचे अध्यक्ष बाबा कदम यांनी सांगितले. तसेच या खात्यात कायमस्वरूपी कर्मचाऱ्यांची भरती करण्याची मागणीही त्यांनी केली.

..
तीन वर्षांसाठी आठ कोटी मोजणार
भांडुप जलशुद्धीकरण केंद्राची देखभाल महापालिकेचे कामगार, कर्मचारी नसल्याने खासगी कंपनीकडूनच देखभाल केली जात असून जुने कंत्राट २६ जून २०२५मध्ये  संपुष्टात आल्याने नवीन कंपनीची निवड केली जात आहे. त्यामुळे आता पुढील तीन वर्षांसाठी नवीन कंत्राटदारांची निवड केली जात असून यासाठी साडेआठ कोटी रुपये खर्च केले जाणार आहेत.