आरोग्य विभागातील १२०० कर्मचाऱ्यांचे वेतन रखडले

मुंबई, ता. २५ : पालिकेच्या सार्वजनिक आरोग्य विभागांतर्गत कार्यरत असलेल्या डी. एस. इंटरप्रायझेस या कंत्राटदाराकडून नियुक्त करण्यात आलेले तब्बल १,२०० कर्मचारी गेल्या तीन महिन्यांपासून वेतनापासून वंचित आहेत. याविरोधात कर्मचाऱ्यांनी ठिय्या आंदोलनाचा इशारा दिला आहे. सातत्याने लक्ष वेधूनही दुर्लक्ष झाल्याने हे पाऊल उचलण्यात येत असल्याचे म्युनिसिपल कर्मचारी कामगार सेनेकडून सांगण्यात आले. आरोग्य विभागातील परिचारिका, लॅब टेक्नीशियन, फार्मासिस्ट आणि डाटा ऑपरेटर यांचे गेल्या तीन महिन्यांचे हक्काचे वेतन रखडले आहे. त्यामुळे शिक्षण, आरोग्य, कर्जाचे हप्ते व रोजची कुटुंबाची दैनंदिनी कशी चालवावी, असा प्रश्न कर्मचाऱ्यांना भेडसावत आहे. कामगारांच्या मागण्यांबाबत पालिका आयुक्त भूषण गगराणी यांना पत्र देऊन येत्या १५ दिवसांत मागण्यांबाबत निर्णय न झाल्यास तीव्र आंदोलन करण्यात येईल, असा इशारा कामगार संघटनेचे अध्यक्ष बाबा कदम आणि चिटणीस संजय वाघ यांनी दिला आहे.