अखेर हॉटेलांवर मराठी पाट्या
पालघरमध्ये गुजराती फलक हटवले

मनोर, ता. २५ (बातमीदार) : गुजराती पाट्यांविरोधात मनसेने केलेल्या आंदोलनानंतर मुंबई-अहमदाबाद महामार्गावरील हॉटेलांवर मराठी भाषेतील पाट्या लावण्यास सुरुवात झाली आहे. मनसेच्या कार्यकर्त्यांनी गुरुवारी व्‍यावसायिकांना इशारा दिला होता.

पालघर तालुक्यातील हालोली गावच्या हद्दीतील हॉटेलच्या गुजराती भाषेतील साईन बोर्डची तोडफोड केली होती, तर रस्ते आस्थापना शाखेच्या पदाधिकाऱ्यांकडून चारोटी भागातील हॉटेलमालकांना समज दिली होती.
वसई-विरार महापालिकेच्या हद्दीतील महामार्गावरील ससूनवघर आणि जुचंद्र फाटा परिसरातील काठीयावाडी हॉटेलांचे साईन बोर्ड गुजराती भाषेत आहेत. गुजराती भाषेतील साईन बोर्ड हटवण्याकडे दुर्लक्ष केले जात असल्याचे बोलले जात आहे.

आंदोलकांची शोधाशोध
गुजराती फलक असलेल्या हॉटेलांवर आंदोलन होण्याची शक्यता असल्यामुळे पोलिसांनी सातिवली येथे बंदोबस्त लावला होता. मनसेच्या कार्यकर्त्यांनी हालोली गावच्या हद्दीत आंदोलन केल्याने पोलिसांची धावपळ उडाली होती. पोलिस पोहोचण्यापूर्वी मनसेचे कार्यकर्ते आंदोलन करून निघून गेले होते. मनसेच्या पदाधिकाऱ्यांवर गुन्हे दाखल करण्यासाठी दबाव असून, पोलिसांनी आंदोलकांची शोधाशोध सुरू केली. गुरुवारी रात्री कैलाश सरोवर हॉटेलच्या व्यवस्थापकासह दोघांचा जबाब नोंदवून घेण्यात आला. फूड हब परिसरात असलेल्या कैलास सरोवर हॉटेलवरील गुजराती नामफलक हटवल्याची माहिती हॉटेल व्यवस्थापकाने पोलिसांना सांगितले.
महाराष्ट्र राज्यात व्यवसाय करायचा आणि मराठी भाषेला दुय्यम दर्जा सहन केला जाणार नाही. हॉटेलमालकांनी आठवडाभरात मराठी पाट्या लावाव्यात अन्यथा आंदोलनाशिवाय पर्याय शिल्लक राहणार नाही, असा इशारा मनसे रस्ते आस्थापना विभागाचे जिल्हाध्यक्ष ज्ञानेश पाटील यांनी दिला.
------------------
३० हॉटेलवर मराठी नामफलक
मुंबई-अहमदाबाद महामार्गावरील तलासरीपासून मनोरपर्यंतच्या ३० हॉटेलांवरील नामफलक मराठी भाषेत लावण्यात आले आहेत. मराठी भाषेनंतर अन्य भाषांना स्थान देण्यात आल्याची माहिती नाव न छापण्याच्या अटीवर चिलिया कॉम्युनिटीच्या हॉटेलमालकांनी दिली.