ठाणे जिल्ह्यात पावसाची संततधार
सकाळ वृत्तसेवा
ठाणे, ता. २५ ः जिल्हाभरात दोन दिवसांपासून संततधार पावसामुळे शहर आणि ग्रामीण भागाला दिलासा मिळाला आहे. सतत पडणारा पाऊस आणि रस्त्यावरील खड्ड्यांमुळे शहरातील मुख्य आणि अंतर्गत रस्त्यावर नागरिकांना वाहतूक कोंडीचा सामना करावा लागला. पूर्व द्रुतगती महामार्गावर कोपरी पूल, मुलुंड टोलनाका येथे वाहनांच्या रांगा लागल्या होत्या. मुंबई-नाशिक महामार्ग आणि इतर मार्गांवरही वाहतूक संथ गतीने सुरू होती. ग्रामीण भागात पावसाने दमदार पुनरागमन केल्याने शेतकरी सुखावला आहे.

ठाणे जिल्ह्यातील शहरासह ग्रामीण भागात गुरुवारी सायंकाळपासून संततधार सुरू आहे. ठाणे शहरात शुक्रवारी सकाळी साडेआठपर्यंतच्या २४ तासांत ४४.९५ मिमी पावसाची नोंद झाली, तर शुक्रवारी सकाळी साडेआठ ते सायंकाळी सहा वाजेपर्यंत ४९ मिमी पावसाची नोंद झाली. पूर्व द्रुतगती मार्गावर मुंबईच्या दिशेने जाणारी वाहने वाहतूक कोंडीत अडकून पडली होती. माजिवडा, तीन हात नाका, कोपरी पूल भागातही कोंडी झाली. ही कोंडी फोडण्यासाठी ठाणे वाहतूक पोलिसांनी ठाण्याच्या दिशेच्या दोन वाहिन्या मुंबईसाठी खुल्या केल्या होत्या. त्यामुळे मुंबईहून ठाणे, घोडबंदर, भिवंडी, नाशिकच्या दिशेने वाहतूक करणाऱ्या चालकांना फटका बसला. मुंबई-नाशिक महामार्गावर खारेगाव टोलनाका, साकेत परिसरात वाहतूक कोंडी झाली होती.

दरम्यान, मुरबाड तालुक्यात भात लागवडीची ८५ ते ९० टक्के कामे पूर्ण झाली आहेत. गुरुवारपासून सुरू झालेल्या पावसामुळे रखडलेल्या शेतीच्या कामांना मिळणार असल्याने शेतकऱ्यांत आनंदाचे वातावरण आहे. भिवंडी शहर व ग्रामीण भागात मध्यरात्रीपासून पावसाची संततधार सुरू असून, यंदा शहरातील सखल भागात कुठेही पाणी साचले नव्‍हते. कामवारी नदीपात्रात पाणीपातळीत वाढ झालेली आहे. पावसाचा जोर कायम राहिल्यास नदीलगतच्या शहर व ग्रामीण भागातील शेलार, म्हाडा कॉलनी, ईदगाह या परिसरात पाणी शिरण्याची शक्यता वर्तवली जात आहे.