वाकोला केबल स्टे ब्रिजच्या लोकार्पणाची प्रतीक्षा
उपनगरांतील वाहतूक सुसाट होणार

सकाळ वृत्तसेवा
मुंबई, ता. २५ : सांताक्रूझ-चेंबूर लिंक रोडचा विस्तारित भाग असलेल्या वाकोला येथील केबल स्टे ब्रिजचे काम पूर्ण झाले. पश्चिम द्रुतगती मार्गाला ओलांडणाऱ्या या १०० मीटर लांबीच्या वक्राकार पुलाच्या खाली लावलेली तात्पुरती आधाररचना हटवण्याचे काम सुरू आहे. तसेच पुलाच्या खांबाचे सौंदर्यीकरण जलद गतीने सुरू आहे. या पुलामुळे पूर्व-पश्चिम उपनगरांना जोडणारी वाहतूक वेगवान होणार असल्याने वाहनाधारकांना आता हा पूल कधी सुरू होणार याची प्रतीक्षा लागली आहे.
सांताक्रूझ-चेंबूर लिंक रोडचे (एससीएलआर) काम याधीच पूर्ण झाले असून, चेंबूर-वाकोला हा टप्पा वाहतुकीसाठी खुला आहे; मात्र पुढे पश्चिम द्रुतगती मार्गावर जाताना वाहनधारकांना मोठ्या प्रमाणात वाहतूक कोंडीचा सामना करावा लागत आहे. त्यामुळे एमएमआरडीएने कालिनाहून आलेल्या वाहनांना थेट उड्डाणपुलावरून पश्चिम द्रुतगती मार्गावर जाता यावे म्हणून महाकाय केबल स्टे ब्रिज उभारला आहे. त्याचे संपूर्ण काम झाले असून, त्याच्या उभारणीकरिता तात्पुरत्या स्वरूपात लावलेले आधार काढण्याचे काम सुरू आहे. त्यामुळे हा पूल लवकरच सेवेत येणार असल्याचे दिसत आहे. परिणामी चेंबूरहून आलेल्या वाहनधारकांना कोणत्याही वाहतूक कोंडीशिवाय थेट पश्चिम द्रुतगती मार्गावर जाता येणार आहे. हा पूल सुरू झाल्यानंतर बीकेसी आणि वाकोला परिसरातील वाहतूक कोंडी कमी होऊ शकणार आहे.