माघी गणेशोत्सवातील गणेशमूर्तींच्या विसर्जनाचा मार्ग मोकळा
नैसर्गिक जलस्रोतात विसर्जन करण्यास परवानगी

मुंबई, ता. २५ : माघी गणेशोत्सवात समुद्रात किंवा नैसर्गिक जलस्रोतात पीओपी मूर्तींच्या विसर्जनाला बंदी घालण्यात आली होती. कृत्रिम तलावातील विसर्जनाला विरोध करीत काही गणेश मंडळांनी मूर्ती विसर्जित न करण्याचा निर्णय घेतला. साडेपाच महिन्यांनी उच्च न्यायालयाने पीओपीच्या उंच मूर्तींचे नैसर्गिक जलस्रोतात विसर्जन करण्यास परवानगी दिल्याने या मंडळांना मोठा दिलासा मिळाला आहे. या निर्णयानंतर येत्या २ ऑगस्टला मूर्तींचे विसर्जन करण्यात येणार आहे. पश्चिम उपनगरातील चारकोपचा राजा तसेच कांदिवलीच्या श्री या मंडळांचा समावेश आहे.

पर्यावरणाच्या दृष्टीने पीओपी मूर्तींवर बंदीचा प्रयत्न सुरू होता. यंदाच्या माघी गणेश जयंती उत्सवात पीओपी गणेशमूर्तींची कुठेही विक्री होऊ देऊ नका, झालीच तर त्या गणेशमूर्तीचे विसर्जन करू देऊ नका, असे आदेश उच्च न्यायालयाने ३० जानेवारी रोजी राज्य प्रदूषण नियंत्रण मंडळ (एमपीसीबी), राज्य सरकार आणि मुंबई महापालिकेसह अन्य महापालिकांना दिले होते. या पार्श्वभूमीवर माघी गणेशोत्सवात मात्र महापालिकेने पीओपी मूर्तींच्या विसर्जनास बंदी घातली. १२ किंवा १३ फुटापर्यंतच्या उंच मूर्तींचे विसर्जन करण्यासाठी खास कृत्रिम तलावही तयार केले; मात्र काही सार्वजनिक मंडळांनी नैसर्गिक तलावात किंवा समुद्रातच विसर्जन करण्याचा आग्रह धरला. हा पेच न सुटल्याने माघी गणेशमूर्तीचे विसर्जन रखडले हाेते.