पालघर विमानतळाच्या व्यवहार्यतेचा अहवाल सप्टेंबरमध्ये

मुंबई, ता. २५ : मुंबई महानगर क्षेत्रात (एमएमआर) ग्रोथ हब उभारले जाणार आहे. त्या पार्श्वभूमीवर मुंबई, ठाणे आणि पालघर जिल्ह्यात मोठ्या प्रमाणात पायाभूत सुविधा उभारल्या जाणार आहेत. त्याचाच भाग म्हणून पालघर जिल्ह्यात वाढवण परिसरात विमानतळ उभारले जाणार असून त्याबाबत महाराष्ट्र एअरपोर्ट डेव्हलपमेंट कंपनीकडून (एमएडीसी) त्याची व्यवहार्यता तपासली जात आहे. त्यांचा अभ्यास अंतिम टप्प्यात आला असून सप्टेंबरअखेर त्याचा अहवाल येणार आहे. मुंबईतील छत्रपती शिवाजी महाराज आंतराराष्ट्रीय विमानतळावर मोठ्या प्रमाणात ताण येत असल्याने राज्य सरकारने नवी मुंबई विमानतळ उभारले आहे. तसेच भविष्याची तयारी म्हणून पालघर जिल्ह्यात वाढवण बंदर आणि विमानतळ उभारण्याची राज्य सरकारची योजना आहे. त्या पार्श्वभूमीवर या प्रकल्पाचा अभ्यास करण्यासाठी आणि व्यवहार्यता तपासण्यासाठी एमएडीसीकडून काम सुरू आहे. त्याबाबतचा अहवाल सप्टेंबरपर्यंत राज्य सरकारला सोपवण्यात येणार असल्याची माहिती एमएडीसीच्या एका अधिकाऱ्याने दिली. दरम्यान, पालघर जिल्ह्यात वाढवण बंदरामुळे वाढवण हे एक मोठे लाॅजिस्टिक पार्क म्हणून विकसित होणार आहे. त्याचाच भाग म्हणून येथे विमानतळ विकसित करण्यावर राज्य सरकारचा भर आहे.