उपराष्ट्रपतिपदाच्या निवडणुकीची तयारी सुरू
राज्यसभेच्या महासचिवांची निवडणूक निर्णय अधिकारी म्हणून नियुक्ती
मुंबई, ता. २५ : देशाच्या उपराष्ट्रपतिपदाच्या निवडणुकीच्या आवश्यक प्रक्रियेसाठी भारत निवडणूक आयोगाने नियुक्त्या जाहीर केल्या आहेत. त्यानुसार राज्यसभा सचिवालयाच्या महासचिवांची निवडणूक निर्णय अधिकारी म्हणून नियुक्ती केली आहे. तसेच राज्यसभेच्या संयुक्त सचिव गरिमा जैन आणि संचालक (राज्यसभा सचिवालय) विजय कुमार यांची सहाय्यक निवडणूक निर्णय अधिकारी म्हणून नियुक्ती करण्यात आली आहे. या नियुक्त्या कायदा व न्याय मंत्रालयाच्या सल्ल्यानुसार आणि राज्यसभेचे उपसभापती यांची संमती घेऊन करण्यात आली आहे.
संविधानातील अनुच्छेद ३२४ नुसार, उपराष्ट्रपतिपदाच्या निवडणुकीचे आयोजन करणे ही निवडणूक आयोगाची जबाबदारी असून या निवडणुकीसाठी ‘राष्ट्रपती आणि उपराष्ट्रपती निवडणूक अधिनियम, १९५२’ आणि ‘नियम, १९७४’ लागू होतात. या अधिनियमाच्या कलम ३ नुसार, निवडणूक आयोग केंद्र सरकारच्या सल्ल्यानुसार निवडणूक निर्णय अधिकारी नियुक्त करतो. परंपरेनुसार, लोकसभा किंवा राज्यसभा सचिवालयाचे महासचिव हे निवडणूक निर्णय अधिकारी म्हणून आलटून पालटून नियुक्त केले जातात. निवडणूक आयोगाने आज केलेल्या नियुक्त्यांबाबत राजपत्र अधिसूचना स्वतंत्रपणे प्रकाशित करण्यात येणार आहे.