गटाराच्या घाण पाण्यात केळी धुण्याचा प्रकार
डोंबिवली, ता. २५ ः रस्त्यावर साचलेल्या गटाराच्या घाण पाण्यात केळी धुतली जात असल्याचा प्रकार डोंबिवली पश्चिमेला उघडकीस आला आहे.
याचा एक व्हिडिओ शिवसेना ठाकरे गटाचे विभागप्रमुख राजेंद्र सावंत यांनी सोशल मीडियावर व्हायरल केला असून हे विक्रेते नागरिकांच्या जीवाशी खेळ करीत असल्याच्या प्रतिक्रिया उमटत आहेत. सावंत यांनी संबंधित फळविक्रेत्याला याविषयी विचारणा केली असता, माझे नुकसान तुम्ही भरून देणार का, अशा प्रकारचा उलट सवाल विक्रेत्यांना करीत गुर्मी दाखवली. तसेच नागरिकांचे आरोग्य धोक्यात आले तर त्याला जबाबदार कोण, असा प्रश्न विक्रेत्याला करताच त्याने अरेरावी करीत तेथून काढता पाय घेतला. या फळविक्रेत्यावर कडक कारवाई करण्याची मागणी नागरिकांकडून होत आहे.