२७ वर्षांनी आरोपीची निर्दोष मुक्तता
टोमणा हे आत्महत्येचे कारण नव्हे; उच्च न्यायालय
सकाळ वृत्तसेवा
मुंबई, ता. २५ : एखाद्या महिलेला तिचा वर्ण आणि स्वयंपाकावरून टोमणे मारणे हे घरगुती भांडण आहे, परंतु त्या कारणास्तव जर महिलेने आत्महत्या केली, तर ते आत्महत्येस प्रवृत्त केल्याचे कारण म्हणता येणार नाही, असे निरीक्षण नुकतेच उच्च न्यायालयाने नोंदवले आणि २७ वर्षे जुन्या खटल्यातून आरोपीची निर्दोष मुक्तता केली.

अर्जदार पतीने मृत पत्नीला तिच्या काळ्या वर्णाबद्दल आणि तिच्या सासऱ्याने जेवणाच्या गुणवत्तेबद्दल टोमणे मारल्याचे आरोप जरी कौटुंबिक छळाचे असले तरी ते क्रूर कृत्य किंवा आत्महत्येच्या कारणांच्या व्याख्येत मोडणारे नाहीत, असे निरीक्षणही न्या. श्रीराम मोडक यांच्या एकलपीठाने नोंदवले. ३१ जुलै १९९८ रोजी सातारा जिल्हा सत्र न्यायालयाने कलम ४९८-अ आणि ३०६ अंतर्गत पतीला दोषी ठरवून अनुक्रमे पाच वर्षांची शिक्षा सुनावली होती.
अर्जदार सदाशिव रूपनवर यांच्याशी लग्नाच्या पाच वर्षांनंतर मृत प्रेमा यांनी विहिरीत उडी मारून आत्महत्या केली होती. आपला वर्ण आणि स्वयंपाक न जमणे हे कौटुंबिक छळाचे कारण असल्याचे नातेवाइकांना सांगितले होते. अर्जदार मृत प्रेमाला वर्णावरून अनेकदा टोमणे मारत असे आणि दुसरे लग्न करण्याची धमकी देत असे, नातेवाइकांची साक्ष प्रतिवाद्यांनी ग्राह्य धरली हाेती, परंतु या सर्व कारणांचा विचार केला तर ते वैवाहिक जीवनातून उद्भवणारे भांडण आहे. म्हणून भादंविच्या कलम ४९८-अ (छळवणूक) आणि ३०६ (आत्महत्येला प्रवृत्त करणे) अंतर्गत गुन्हा सिद्ध होत नाही, असे न्यायालयाने ११ जुलैच्या आदेशात म्हटले आहे.

‘ही आत्महत्या होती हे मान्यच आहे, परंतु सरकारी वकिलांना छळ आणि आत्महत्येचा संबंध सिद्ध करता आलेला नाही. मृत पीडितेचा छळ झाला होता, परंतु तो अशा प्रकारचा छळ नव्हता, ज्यामुळे फौजदारी कायदा लागू करता येईल. त्यामुळे कायद्याच्या दृष्टीने कनिष्ठ न्यायालयाचा निर्णय कायम ठेवता येत नाही,’ असेही अधोरेखित करून न्यायालयाने सातारा जिल्हा सत्र न्यायालयाचा निकाल रद्द केला.