परवानगीअभावी बेलापूर जेट्टी येथील क्रूझ सेवा ठप्प; पर्यटकांचा हिरमोड
तुर्भे, ता. २७ (बातमीदार) : बेलापूर जेट्टी येथून सुरू झालेली बहुचर्चित क्रूझ सेवा परवानगीअभावी अनिश्चित काळासाठी बंद करण्यात आली आहे. परिणामी, सागरी पर्यटनाचा आनंद लुटण्यासाठी आलेल्या पर्यटकांचा हिरमोड होत आहे. लवकरच ही सेवा पुन्हा सुरू करावी, अशी मागणी पर्यटक व स्थानिकांकडून होत आहे.
नवी मुंबईला लाभलेला सागरीकिनारा जलपर्यटनासाठी उपयुक्त ठरत असून, याच पार्श्वभूमीवर बेलापूर जेट्टी येथे जलवाहतूक सेवा विकसित करण्यात आली. याआधी बेलापूर-गेटवे वॉटर टॅक्सीसेवा काही काळासाठी सुरू झाली होती; मात्र तीदेखील बंद पडली. त्यानंतर येथे क्रूझ स्वरूपातील तरंगते हॉटेल सुरू करण्यात आले, जे पर्यटकांना खाडीतून सी लिंकपर्यंत फेरफटका मारण्याचा अनुभव देत होते. ही सेवा सुरू झाल्यानंतर तिला पर्यटकांसह स्थानिकांकडूनही चांगला प्रतिसाद मिळाला. विशेषतः कुटुंबासोबत फिरायला येणाऱ्यांसाठी ही सेवा आकर्षणाचे केंद्रबिंदू ठरली होती; मात्र मेरिटाइम बोर्डाकडून मिळणाऱ्या परवानग्यांची सहा महिन्यांची मुदत गेल्या महिन्यात संपली. त्यामुळे परवानगी न मिळाल्याने ही सेवा सध्या बंद ठेवण्यात आली आहे. या बंदीची अधिकृत पूर्वसूचना न मिळाल्यामुळे मुंबई, पनवेल, ठाणे, मुलुंड, ऐरोली येथून आलेल्या पर्यटकांना प्रत्यक्ष स्थळी येऊनच ही माहिती समजते. त्यामुळे वेळ आणि पैसे खर्चून आलेल्या पर्यटकांची निराशा होते. दरम्यान, ही सेवा लवकरच पूर्ववत सुरू व्हावी, यासाठी परवानगी मिळवण्याची प्रक्रिया सुरू असल्याचे ऑपरेटरकडून सांगण्यात आले आहे.