खालापूर, ता. २७ (बातमीदार)ः खोपोलीमार्गे पुण्याला जाणाऱ्या जुन्या राष्ट्रीय महामार्गावर महिन्याभरात भीषण अपघातात तिघांचा मृत्यू तर दहापेक्षा अधिकजण जखमी आहेत. त्यामुळे या मार्गावर अवजड वाहनांवर बंदीची गरज आहे.
मुंबई-पुणे द्रुतगती मार्ग अस्तित्वात आल्यापासून ट्रक, ट्रेलर, टँकर व कंटेनरसारखी अवजड वाहने द्रुतगती मार्गाचा वापर करतात. द्रुतगती मार्गामुळे जुन्या राष्ट्रीय महामार्गावरील खंडाळा घाटाचा कठीण प्रवास टाळला जातो. द्रुतगती मार्गावरून अवजड वाहने घाट सहज पार करतात; परंतु टोल वाचवण्यासाठी काही अवजड वाहने खोपोली सायमाळमार्गे जुन्या घाटाचा पर्याय निवडतात; परंतु अवघड वळण, कठीण चढावामुळे अनेकदा अवजड वाहने अडकून बसतात.
--------------------------------------
अवजड वाहनांचा धोका
महिनाभरात अपघाताच्या दोन घटना घडल्या आहेत. लोखंडी पाइपची वाहतूक करणारा ट्रक अवघड वळणावर बंद पडल्याने झालेल्या अपघातात दोन महिलांचा मृत्यू तर सहा जण जखमी झाले. तर दुसऱ्या घटनेत जुन्या मार्गाने जाणारा कंटेनर अवघड घाट रस्ता, वळणामुळे अनियंत्रित होताना कारला धडकला होता. या अपघातात एका महिलेचा मृत्यू तर पाच जण जखमी झाले होते.
----------------------------------
महाराष्ट्र रस्ते विकास महामंडळ, आयआरबी यंत्रणेशी उपाययोजनांबाबत आढावा घेण्यात येत आहे. शिवाय या भागातील कारखान्यातून अवजड वाहतूक करणारी वाहने द्रुतगती मार्गाने जातील, यासाठी सूचना दिल्या आहेत.
- सचिन हिरे, पोलिस निरीक्षक, खोपोली