बाप्पांसाठी पालिकेकडून शाडूची माती
पर्यावरणपूरक गणेशोत्सवासाठी मूर्तिकारांना ३४ टन शाडू मातीचे मोफत वाटप
पनवेल, ता. २७ (बातमीदार) ः शहरामध्ये शाडू मातीच्या मूर्ती घडविण्याकरिता प्रोत्साहन मिळावे, जास्तीत जास्त पर्यावरणपूरक मूर्तींची प्रतिष्ठापना व्हावी, यासाठी पनवेल महापालिकेकडून मूर्तिकारांना दरवर्षीप्रमाणे मोफत शाडू मातीचे वाटप शनिवारी (ता. २६) केले. गणेशोत्सव पर्यावरणपूरक पद्धतीने साजरा करण्यासाठी पालिका आयुक्त मंगेश चितळे यांच्या मार्गदर्शनाखाली उपायुक्त स्वरूप खारगे यांनी पर्यावरण विभागामार्फत नियोजन व कार्यवाहीदेखील सुरू केली आहे.
मागीलवर्षी २० पेक्षा अधिक मूर्तिकारांना १२ टन इतकी माती मोफत दिली होती. मात्र यंदा उत्सवाच्या व्यापकतेनुसार मातीचा पुरवठा वाढवला आहे. यावर्षी २४ पेक्षा अधिक मूर्तिकारांनी ३४ टन इतकी शाडू माती पर्यावरणपूरक मूर्ती घडविण्यासाठी मागणी केली होती. त्यानुसार कुंभारवाडा, पनवेल येथे उपायुक्त स्वरूप खारगे यांच्या प्रमुख उपस्थितीत शाडू मातीचे वाटप व मूर्ती कारखान्याला भेट देण्यात आली. या वेळी ३४ टन इतकी शाडू माती मूर्तिकारांना मोफत वाटप केली आहे.
स्वरूप खारगे यांनी गणेशमूर्ती कारखान्यांना भेट देऊन संवाद साधला व त्यांना पर्यावरणपूरक मूर्ती निर्मितीसाठी मार्गदर्शन केले. मूर्तिकारांनी पीओपी, केमिकल रंग व प्लॅस्टिकचा वापर टाळण्याचे आवाहन करीत शाडू मातीपासून मूर्ती तयार करण्यावर भर देण्याचे सांगितले. खारगे यांच्या भेटीदरम्यान स्थानिक मूर्तिकारांकडून शाडू मातीपासून बनवलेली गणेशमूर्ती त्यांना भेट देण्यात आली. कार्यक्रमास पर्यावरण विभागाचे प्रमुख मनोज चव्हाण, लिपिक प्रवीण व्हरगळ तसेच पनवेलमधील प्रमुख मूर्तिकार अनंत चिरनेरकर, नरेश कुंभार, गजानन वाजेकर, राहुल घोंगे आदी उपस्थित होते.

पर्यावरणपूरक मूर्तींसाठी उपक्रम
प्रशासनाकडून पर्यावरणपूरक गणेशोत्सवाच्या अनुषंगाने मूर्तिकारांना सेवा-सुविधा पुरविण्यात येत आहेत. पालिकेच्या उपलब्ध असलेल्या जागेनुसार प्रथम अर्जदारास प्राधान्य या तत्त्वावर पर्यावरणपूरक गणेशमूर्ती विक्रीसाठी जागादेखील उपलब्ध करून देण्यात येणार आहे. जास्तीत जास्त पर्यावरणपूरक मूर्तींची प्रतिष्ठापना व्हावी यासाठी पनवेल महापालिकेकडून विविध उपक्रम राबविले जात आहेत. याच अनुषंगाने शाडू माती वाटप उपक्रमामुळे पर्यावरणपूरक गणेशोत्सव साजरा करण्यासाठी मूर्तिकारांचे योगदान व नागरिकांचा सहभाग निश्चितच वाढीस लागेल, असा विश्वास उपायुक्त स्वरूप खारगे यांनी व्यक्त केला आहे.