उपचारांची नैसर्गिक पण जुनी पद्धत
कल्याण पश्चिमेत शेकडो नागरिकांवर उपचार
कल्याण, ता. २७ (बातमीदार) : नागरिकांना वाढत्या वयानुसार जाणवणाऱ्या दुखण्यावर वेळीच रामबाण इलाज करता यावा, या उद्देशाने खर्डीकर शिक्षण प्रसारक मंडळाच्या माध्यमातून कल्याण पश्चिमेतील खर्डीकर क्लासेसमध्ये नैसर्गिक पद्धतीने उपचार करण्यात आले. रविवारी (ता. २७) आयोजित केलेल्या या आरोग्य शिबिरात सकाळी १० ते सायंकाळी ६ वाजेपर्यंत शेकडो नागरिक, महिला, युवक व ज्येष्ठ नागरिकांनी लाभ घेतला.
आपल्या वाढत्या वयानुसार शरीराचे दुखणेही वाढू लागते. विविध ट्रीटमेंटवर होणारा खर्च काहींना परवडणारा नसतो. आपल्या देशात नैसर्गिकरित्या उपचार करण्याची एक पद्धत आहे. त्याच पद्धतीने आज या नागरिकांवर उपचार करण्यात आले. आजवर केवळ शिक्षण क्षेत्रातच नव्हे तर सामाजिक क्षेत्रातही पूर्णपणे योगदान दिलेले आहे आणि पुढेही आमचे कार्य असेच सुरू राहील, असे या वेळी आयोजक डॉ. सुनील खर्डीकर म्हणाले.
औषध गोळ्या, इंजेक्शन घेऊनही सतत जाणवणारी पोटदुखी, कंबरदुखी, गुडघेदुखी अशा शारीरिक दुखण्यांचे निदान करून त्यावर ॲक्युप्रेशर व ॲक्युपंक्चर उपचार पद्धती डॉ. माधुरी कुलकर्णी व करिष्मा खर्डीकर यांनी रुग्णांना दिली. या वेळी मानसोपचारतज्ज्ञांकडून उपस्थितांना मार्गदर्शनही करण्यात आले.