भिवंडी, ता. २७ (वार्ताहर) : केंद्र सरकारच्या मुंबई-वडोदरा महामार्गावर भिवंडी-वाडा रस्त्यावर जाण्यासाठी कोणताही जोडरस्ता नाही. या रस्त्यावर भिवंडीतील लामज सुपेगाव येथे थेट जोडरस्ता निर्माण करण्यासाठी १६० कोटींचा निधी मंजूर करण्यात आला आहे. या मागणीचा भिवंडी लोकसभा मतदारसंघाचे खासदार सुरेश म्हात्रे यांनी केंद्रीय रस्ते वाहतूक व महामार्गमंत्री नितीन गडकरी यांच्याकडे सातत्यपूर्ण पाठपुरावा केला होता. हा प्रस्ताव अंतिम टप्प्यात असून, लवकरच कामाला सुरुवात होणार आहे.
भिवंडी-वाडा मार्गावरून मुंबई-वडोदरा महामार्गावर थेट प्रवेश नसल्याने सुमारे १८ किमीचा वळसा घालावा लागत होता. ज्यामुळे स्थानिक नागरिक, शेतकरी, व्यापारी आणि उद्योजकांना वेळ आणि इंधनाचा खर्च सहन करावा लागत होता. त्यामुळे भिवंडी-वाडा मार्गावर लामज सुपेगाव गावाजवळून महामार्गावर प्रवेशद्वार निर्माण करावे, रस्त्याचे रुंदीकरण, मजबुतीकरण व दुरुस्ती करून अत्याधुनिक वाहतूक सुविधा निर्माण करावी. नवीन इंटरचेंज तयार करून भिवंडी-वाडा मार्ग थेट एक्स्प्रेस वेने जोडावा, यामुळे वाहतूक वेगवान आणि स्थानिकांना सहज उपलब्ध होणार आहे. परिणामी, भिवंडी-वाडा औद्योगिक पट्टा वेगाने विकसित होऊन पाच हजारांहून अधिक नवीन रोजगार संधी निर्माण होण्याची शक्यता आहे.
या प्रकल्पासाठी यापूर्वीही मंत्री गडकरी यांची भेट घेतली होती. नुकत्याच झालेल्या भेटीत जोडणीबाबत केंद्र सरकारने सकारात्मक भूमिका घेतली आहे. त्यासाठी सुमारे १६० कोटींचा निधी मंजूर केल्याची प्रतिक्रिया खासदार म्हात्रे यांनी दिली.