डोंबिवली पश्चिमेला दूषित पाणीपुरवठा
सकाळ वृत्तसेवा
डोंबिवली, ता. २८ : डोंबिवली पश्चिमेतील सोसायट्यांना सातत्याने दूषित पाणीपुरवठा होत असून, यामुळे नागरिक त्रासले आहेत. पिवळसर रंगाचे, फेसाळलेले पाणी घरातील नळाला येत असून, वारंवार पालिका प्रशासनाकडे तक्रार करूनदेखील त्याची दखल घेतली जात नव्हती. सोमवारी (ता. २८) पुन्हा दूषित पाणीपुरवठा झाल्याने नागरिकांनी पालिकेकडे तक्रार केली आहे. दूषित पाण्यामुळे नागरिकांना बाहेरून टॅंकर मागवावा लागत आहे. शिवाय सोसायटीच्या टाक्याही वारंवार साफ करून घ्याव्या लागत आहेत. यामुळे नागरिक कमालीचे त्रासले असून, यावर कायमस्वरूपी तोडगा काढण्याची मागणी होत आहे.

डोंबिवली पश्चिमेला नागरिकांना दूषित पाण्याचा पुरवठा होत आहे. सोमवारी पुन्हा दूषित पाणी घराघरांत आले आहे. पिवळसर किंवा फेसाळलेले पाणी नळाला येत असल्याने त्याचा वापर कसा करावा, असा प्रश्न नागरिकांना पडला आहे. यामुळे सोसायट्यांना जास्तीचे पैसे देऊन बाहेरून टॅंकर मागवावा लागत आहे. जुलै महिन्यात सलग तिसऱ्यांदा दूषित पाणीपुरवठ्याची घटना घडली आहे. येथील शारदा सोसायटीमधील नागरिकांनी याप्रकरणी पालिका प्रशासनाकडे लेखी तक्रार केली आहे.

आरोग्याचा प्रश्न
आजूबाजूच्या सोसायट्यांमध्येही असेच दूषित पाणी येत असल्याचे त्यांनी म्हटले आहे. २४ जुलैला महापालिकेतील कर्मचारी सोसायटीत येऊन पाहणी करून गेले होते. मुख्य वाहिनीतून दूषित पाणी येत असल्याचे त्यांनी त्या वेळी सांगितले. त्यानंतर दोनच दिवसांत पुन्हा असे दूषित पाणी सोसायटीत सोमवारी आले आहे. यामुळे येथील नागरिकांच्या आरोग्याचा प्रश्न निर्माण झाला आहे.

पालिका अधिकाऱ्यांकडे तक्रार
सोमवारी सोसायटीमधील नागरिकांनी पालिका अधिकाऱ्यांची प्रत्यक्ष भेट घेऊन याविषयी तक्रार केली. तसेच कायमस्वरूपी तोडगा काढण्याची विनंती केली आहे. त्यानंतर अधिकारी व कर्मचारी यांनी पाहणी केली. श्रीधर म्हात्रे चौकात असलेली मुख्य वाहिनीवरील गळती बंद केली. यानंतर नागरिकांना स्वच्छ पाणीपुरवठा होईल, असे आश्वासन दिले. सुरक्षिततेचा उपाय म्हणून नागरिकांनी पाणी उकळून गाळून प्यावे, अशी सूचना करण्यात आली आहे.