एकांकिका लेखन स्पर्धेला उत्स्फूर्त प्रतिसाद
राज्यभरातील ८२ लेखक स्पर्धकांचा सहभाग
सकाळ वृत्तसेवा
डोंबिवली, ता. २८ ः श्री कला संस्कार न्यास, डोंबिवली यांच्या वतीने बालनाट्य एकांकिका लेखन स्पर्धा व एकांकिका लेखन स्पर्धा घेण्यात आली. या स्पर्धेचा निकाल नुकताच जाहीर करण्यात आला. या स्पर्धेत राज्यभरातील सुमारे ८२ स्पर्धकांनी सहभाग घेतला होता. मराठी नाट्यसृष्टीतील आघाडीचे लेखक नीरज शिरवईकर व लेखिका हर्षदा बोरकर यांनी स्पर्धेचे परीक्षण केले. विजेत्यांची नावे संस्थेच्या वतीने जाहीर करण्यात आली असून, सप्टेंबर महिन्यात बक्षीस वितरण करून त्यांना सन्मानित केले जाणार आहे.
डोंबिवलीतील श्री कला संस्कार न्यास संस्थेच्या वतीने दिवंगत सुलभा देशपांडे यांच्या स्मृतीस अभिवादन करून बालनाट्य एकांकिका लेखन स्पर्धा व एकांकिका लेखन स्पर्धा पार पडली. मुंबई, पुणे, सातारा, सांगली, कोल्हापूर, नाशिक, कल्याण, डोंबिवलीसह बेळगाव येथून ४० बालनाट्य लेखक स्पर्धक आणि ४२ एकांकिका लेखक स्पर्धकांनी या स्पर्धेत सहभाग घेतला.
नीरज शिरवईकर म्हणाले, की नाटककाराला वाटणाऱ्या वैयक्तिक संवेदना समाजमान्य चौकटीच्या बाहेर जाऊन तपासाव्या लागतात आणि मग त्याला अनुसरून पात्ररचना करून कथाबीज शोधावे लागते. विजेत्या एकांकिकांना गुण देताना हा मापदंड ध्यानात ठेवला गेला आहे. नाटकातून स्वतःचा शोध घेण्याची प्रक्रिया जाणवणे महत्त्वाचे. संहितेला सुरुवात, मध्य आणि शेवट असणे, पात्रांच्या मानसिक, भावनिक स्थितीमध्ये बदल होणे, अशा काही वैशिष्ट्यांना प्राधान्य दिले गेले आहे, असे ते म्हणाले.
हर्षदा म्हणाल्या, की श्री कला संस्कार न्यास आयोजित एकांकिका आणि बालनाट्य एकांकिका लेखन स्पर्धेच्या निमित्ताने अनेक हात लिहिते झाले. विविध महत्त्वाच्या विषयांना नाट्यरूप मिळालं. या लेखनावर जाणकार दिग्दर्शकीय संस्कार व्हावे, तांत्रिक बाबींनी त्यात कलात्मक भर घालावी आणि होतकरू प्रयत्नशील कलाकारांनी अभिनयातून प्रेक्षकांपर्यंत कलाकृती पोहोचवावी. प्रेक्षकांना नाट्यानुभव द्यावा म्हणजे नाट्य लेखकांच्या शब्दांना सजीवत्व लाभेल. संस्थेच्या या उपक्रमामुळे नाट्यसंहिता कोषात मोलाची भर पडली आहे.