एक किलो हायब्रीड गांजासह दोघांना अटक

ठाणे : गांजाविक्रीसाठी आलेल्या मुंब्र्यातील इरफान गुलाल रसूल मुलतानी (वय ४०) आणि त्याचा खोणी गावातील साथीदार आरिफ अबूबकर तयाल (वय २९) या दोघांना मुंब्रा पोलिसांनी रविवारी (ता. २७) रात्री अटक केली. त्यांच्याकडून २५ लाख रुपये किमतीच्या एक किलो गांजासह ४९९ रुपये किमतीचा इलेक्ट्रिक वजन काटा, असा एकूण २५ लाख ६९९ रुपये किमतीचा मुद्देमाल मुंब्रा पोलिसांनी जप्त केला. मुंब्रा, खर्डी रोड येथे अमली पदार्थाची विक्री करण्यासाठी एक जण येणार असल्याची माहिती मुंब्रा पोलिस ठाण्याचे पोलिस हवालदार आव्हाड यांना मिळाली होती. त्यानुसार वरिष्ठ पोलिस निरीक्षक अनिल शिंदे यांच्या मार्गदर्शनाखाली मुंब्रा पोलिस ठाण्याचे गुन्हे प्रकटीकरण अधिकारी तथा सहाय्यक पोलिस निरीक्षक तेजस सावंत यांच्या पथकाने सापळा रचून इरफान आणि आरिफ तयाल या दोघांना ताब्यात घेतले. याप्रकरणी विक्री करण्याकरिता गांजा जवळ बाळगल्याप्रकरणी त्या दोघांविरोधात गुन्हा दाखल करत त्यांना अटक करण्यात आली. याप्रकरणी वरिष्ठ पोलिस निरीक्षक अनिल शिंदे यांच्या मार्गदर्शनाखाली तपास सुरू आहे.