तोतया जीएसटी निरीक्षकाला चोप
स्पर्धा परीक्षांच्या विद्यार्थ्यांची फसवणूक

कल्याण, ता. २८ (वार्ताहर) : जीएसटी निरीक्षक असल्याचे सांगत स्पर्धा परीक्षांचे क्लास चालवणाऱ्या तोतया जीएसटी निरीक्षकाला मनसेच्या विद्यार्थी सेनेने चोप दिला. स्पर्धा परीक्षांची विद्यार्थांकडून अवाजवी फी घेऊन फसवणूक केल्याप्रकरणी पोलिसांनी या ठगाला त्याब्यात घेतले आहे.

कल्याण रेल्वेस्थानकासमोर सिद्धार्थ लॉजिक नावाने स्पर्धा परीक्षांचे शिकवणी वर्ग सिद्धार्थ सिंग चंडेल याने सुरू केले होते. त्याने आतापर्यंत आपण ७०० विद्यार्थ्यांना सरकारी नोकरी लावले असल्याचे सांगत विद्यार्थ्यांचे प्रवेश करून घेतले; मात्र या विद्यार्थ्यांना योग्य प्रकारे न शिकवता विद्यार्थ्यांकडून वारेमाप फी आकारून योग्य शिकवणी न देता विद्यार्थ्यांना दमदाटी करण्याचा प्रकार सिद्धार्थ चांडेल हा करत होता. याची तक्रार पीडित विद्यार्थ्यांनी महाराष्ट्र नवनिर्माण विद्यार्थी सेनेचे शहर अध्यक्ष विनोद केणे यांच्याकडे केली असता, मनविसेचे जिल्हाध्यक्ष परेश चौधरी, शहराध्यक्ष विनोद केणे आणि इतर पदाधिकाऱ्यांनी याठिकाणी जीएसटी निरीक्षकाला त्याच्या पदाबाबत विचारणा केली असता, त्याची बोबडी वळली. सरकारी अधिकारी असताना आपण शिकवणी वर्ग कसे घेऊ शकता, असा सवाल मनसेच्या कार्यकर्त्यांनी उपस्थित केला. या प्रश्नाचे समाधानकारक उत्तर न दिल्याने या वेळी संतप्त झालेल्या मनसेच्या पदाधिकाऱ्यांनी सिद्धार्थ सिंग चांडेल याला चोप देत विद्यार्थ्यांची घेतलेली फी परत करण्याची मागणी केली.