वांद्रे स्थानकाचा ऐतिहासिक वारसा अधोरेखित
सकाळ वृत्तसेवा
मुंबई, ता. २९ ः मुंबईच्या उपनगरीय लोकल जीवनवाहिनीत महत्त्वाचे स्थान असलेल्या वांद्रे  रेल्वेस्थानकाच्या ऐतिहासिक वारशाला आणि सांस्कृतिक ओळखीला अधोरेखित करणारा वांद्रे स्थानक महोत्सव मोठ्या उत्साहात साजरा करण्यात आला. पश्चिम रेल्वेने यासाठी पुढाकार घेतला होता.
या सोहळ्यात वांद्रे रेल्वेस्थानकाचे विशेष स्मरणीय टपाल तिकिटाचे अनावरण करण्यात आले. या कार्यक्रमाला पश्चिम रेल्वेचे अपर महाव्यवस्थापक प्रदीप कुमार, मुंबई मध्य विभागाचे विभागीय रेल्वे व्यवस्थापक पंकज सिंह आणि डाक विभागाच्या संचालिका कैया अरोरा यांची प्रमुख उपस्थिती होती. हे टपाल तिकीट म्हणजे वांद्रे स्थानकाच्या गौरवशाली इतिहासाला दिलेला उजाळा होता. महोत्सवाच्या दरम्यान विविध नृत्य सादरीकरणे, कराओके सत्र आणि विविध स्पर्धांचे आयोजन केले. आर्ट अँड क्राफ्ट आणि व्लॉग मेकिंग स्पर्धांतील विजेत्यांना मान्यवरांच्या हस्ते गौरविण्यात आले. विजेत्यांच्या सर्जनशीलतेतून वांद्रे स्थानकाचा आत्मा आणि सांस्कृतिक ऊर्जेला सुंदर रूप मिळाले.

हेरिटेज वारसा
१८६४ मध्ये सुरू झालेले वांद्रे स्थानक हे मुंबईतील अत्यंत महत्त्वाच्या उपनगरीय स्थानकांपैकी एक आहे. १८८८ मध्ये उभारलेली मुख्य इमारत विक्टोरियन गॉथिक आणि स्थानिक स्थापत्यशैलीचे अनोखे उदाहरण आहे.  नुकतेच या स्थानकाचा पुनर्विकास करून स्थानकाच्या हेरिटेज लूकला नवी झळाळी देण्यात आली आहे.