रागाच्या भरात सावत्र आईची हत्या

नालासोपारा (बातमीदार) : ऑनलाइन गेम खेळण्यासाठी पैसे न दिल्याने रागाच्या भरात मुलाने सावत्र आईची हत्या केल्याचा प्रकार उघडकीस आला आहे. ही हत्या लपवण्यासाठी मुलाने वडील, चुलत्याची मदत घेऊन डॉक्टरकडून चुकीचा मृत्यूदाखला घेऊन मृतदेह स्मशानभूमीत पुरल्याची धक्कादायक घटना वसईत उघड आली. घटना वसई पश्चिम डिमार्टजवळील पेरियार अपार्टमेंटमध्ये शनिवारी (ता. २६) सकाळी घडली. वसई गुन्हे शाखा कक्ष दोनच्या पथकाने या हत्येचा उलगडा करून सोमवार (ता. २८) स्वतः तक्रार दाखल करून, गुन्हा दाखल केला आहे. आरोपी मुलगा इम्रान खुसरू, वडील अमिर खुसरू, चुलता सलीम खुसरू, तसेच डॉ. आर. आर. गर्ग अशी अटक केलेल्या आरोपींची नाव आहेत, तर आर्शिया खुसरू (वय ६१) असे हत्या झालेल्या आईचे नाव असून, आई ही पेशाने वकील असून उच्च न्यायालयात प्रॅक्टिस करीत असल्याची माहिती मिळते.