खेळण्यासाठी पैसे न दिल्याने सावत्र आईची हत्या
फरशीवर पडल्याचा बनाव; चार आरोपी अटकेत
नालासोपारा, ता. २८ ( बातमीदार) : ऑनलाइन गेम खेळण्यासाठी पैसे न दिल्याने रागाच्या भरात मुलाने आपल्या सावत्र आईची हत्या केल्याची घटना घडली आहे. हा प्रकार वसई पश्चिम डिमार्टजवळील पेरियार अपार्टमेंटमध्ये शनिवारी (ता. २६) सकाळी घडला. ही हत्या लपवण्यासाठी आरोपी मुलाने वडील, चुलत्याची मदत घेऊन डॉक्टरकडून चुकीचा मृत्यू दाखला घेतला. त्यानंतर मृतदेह स्मशानभूमीत पुरला. याप्रकरणी वसई गुन्हे शाखा कक्ष २च्या पथकाने या हत्येचा उलगडा करून सोमवारी (ता. २८) आरोपींना अटक केली.

मुलगा इम्रान खुसरू, वडील अमीर खुसरू, चुलता सलीम खुसरू तसेच डॉ. आर. आर. गर्ग अशी अटक आरोपींची नावे आहेत. आर्शिया खुसरू (वय ६१) असे हत्या झालेल्या महिलेचे नाव असून, ती पेशाने वकील होती आणि उच्च न्यायालयात प्रॅक्टिस करीत असल्याची माहिती पोलिसांनी दिली. आरोपी इम्रान हा वसई पूर्व भातपाडा गोखीवरे येथे राहतो, तर त्याची सावत्र आई ही वसई पश्चिम डिमार्टजवळील इमारतीमध्ये राहत होती. आरोपीने आईच्या घरी जाऊन एक लाख ८० हजार रुपयांची मागणी केली. पण आईने पैसे देण्यास नकार दिल्याच्या रागातून इम्रानने आर्शिया यांचे डोके भिंतीला आपटून आणि नंतर लाथाबुक्क्या मारून तिला गंभीर जखमी केले. यामध्ये आर्शिया यांचा मृत्यू झाला. त्यानंतर आरोपीने कपाटातून दोन सोन्याच्या बांगड्या आणि एक चेनही चोरून नेल्याचे निष्पन्न झाले आहे.

आरोपी इम्रान हा ऑनलाइन गेम खेळायचा. त्याला टेलिग्रामवरून या गेमचा मॅसेज आला होता. त्याला गेम खेळण्यासाठी एक लाख ८० हजारांची गरज होती आणि ते पैसे मागण्यासाठी गेला असता त्याला दिले नाहीत, म्हणून त्याने रागाच्या भरात ही हत्या केल्याचे प्राथमिक तपासात समोर आले आहे. आम्ही प्रथम मुलगा आणि त्याच्या वडिलांना ताब्यात घेऊन अधिक तपासासाठी वसई पोलिसांच्या ताब्यात देऊन गुन्हा दाखल केला आहे, अशी माहिती गुन्हे शाखेचे पोलिस निरीक्षक समीर अहिरराव यांनी दिली.