कुडली गावाच्या हद्दीत रस्त्यांच्या दुरवस्थेमुळे दुर्घटना
रोहा, ता.२९ (बातमीदार)ः सुतारवाडी पुलाचे संरक्षण कठडे तुटल्याने ट्रेलर पलटी झाल्याची घटना रविवारी दुपारी घडली. अशाच प्रकारच्या घटनेची पुनरावृत्ती कुडली गावाच्या हद्दीत लोखंडी कॉईल घेऊन जाणारा ट्रेलर पलटी झाला आहे. त्यामुळे रस्त्यांच्या दुरवस्थेबरोबरच नागमोडी वळणांमुळे वाहनांच्या अपघातांचे सत्र सुरूच आहे.
सुतारवाडी मार्गे विले-भागाड येथील कंपनीत २४ टनाच्या दोन कॉईल घेऊन जाणारा ट्रेलरला कुडली बस थांब्याजवळ रस्त्याचा अंदाज आला नसल्याने पलटी झाला होता. या घटनेत जीवितहानी टळली. पण भिराफाटा-सुतारवाडी ते विले-भागाड या भागातील नागमोडी वळणे, रस्त्यांच्या झालेल्या दुरवस्थेने वाहनांच्या वेगावर नियंत्रण मिळवणे चालकांना अवघड होत आहे. महत्त्वाचे म्हणजे, सुतारवाडी परिसरामध्ये अनेक शाळा आहेत. त्यामुळे अपघाताच्या वाढत्या घटनांकडे गांभीर्याने लक्ष देणे गरजेचे आहे.
--------------------------------
रास्ता-रोकोचा इशारा
सुतारवाडी रस्त्यावर ट्रेलर पलटी होण्याच्या घटना वारंवार घडतात. त्यामुळे रस्त्यांकडे दुर्लक्ष करणाऱ्या प्रशासनाविरोधात ग्रामस्थ रास्तारोको केल्याशिवाय राहणार नाही,असा इशारा शिवशंभो ज्येष्ठ नागरिक संघ सुतारवाडीचे अध्यक्ष मनोहर साळवी यांनी दिला.