पनवेल ता. २९ (बातमीदार)ः अटल सेतूच्या उभारणीनंतर पळस्पा ते कोन रस्त्यावर वाहनांची संख्या मोठ्या प्रमाणात वाढली आहे. परिणामी या मार्गावर प्रचंड वाहतूक कोंडी निर्माण होत असल्याने स्थानिकांसह वाहनचालकांना त्रास होत आहे.
मुंबई आणि नवी मुंबई, जेएनपीटी, रायगड जिल्ह्याला जोडणारा महत्त्वाचा दुवा आहे, मात्र या पुलामुळे पळस्पा ते कोन मार्गावर वाहनांची गर्दी झपाट्याने वाढली आहे. विशेषतः पळस्पा फाट्यावरून येणाऱ्या वाहनांना कोन, मुंबई-पुणे द्रुतगती मार्गाच्या दिशेने जाण्यासाठी अरुंद रस्त्यामुळे तासन्‌तास वाहतूक कोंडीत अडकावे लागते. स्थानिक नागरिक, व्यावसायिकांनी प्रशासनाकडे द्रुतगती मार्ग ते पळस्पा फाटा आणि पुढे कोन रस्ता याचे रुंदीकरणाची मागणी केली आहे. या रस्त्यावर अपघाताच्या घटना वारंवार घडत असल्यामुळेही स्थानिक नागरिकांमध्ये संतापाची भावना आहे. तसेच रस्ता रुंदीकरण करण्याची मागणी होत आहे.
------------------------------------------
गर्दीच्या वेळेत परिस्थिती गंभीर
- अटल सेतू आणि मुंबई-गोवा महामार्गावरील वाहतूक याच मार्गावरून मार्गक्रमण करत असल्याने दिवसेंदिवस वाहनांची संख्या प्रचंड वाढली आहे. परिणामी, या अरुंद रस्त्यावर मोठ्या प्रमाणात वाहतूक कोंडी निर्माण होत आहे. वाहनचालकांना तासन्‌तास अडकून राहावे लागत आहे. सकाळी आणि सायंकाळच्या गर्दीच्या वेळेत ही परिस्थिती अधिकच गंभीर होते.
- ट्रक, ट्रेलर, कंटेनर, डम्पर आणि प्रवासी वाहनांच्या रांगा पळस्पा जंक्शनपासून कोन फाट्यापर्यंत सतत दिसून येतात. या कोंडीमुळे अपघातांची शक्यताही वाढली असून, शाळा, ऑफिस, रुग्णालये गाठण्यास नागरिकांना अडचणींचा सामना करावा लागत आहे. स्थानिक नागरिक, व्यावसायिक आणि राजकीय प्रतिनिधींनी अनेक वेळा उपाययोजनांची मागणी केली आहे.
-----------------------------------
मुंबई-पुणे एक्स्प्रेस हायवे ते पळस्पे फाटा या रस्त्याचे रुंदीकरण करून नंतर अटल सेतू सुरू करायला हवा होता. अटल सेतू सुरू झाल्यापासून पुण्यावरून मुंबईला जाणाऱ्या वाहनांची वर्दळ या ठिकाणी वाढल्याने घराबाहेर पडणे मुश्कील झाले आहे.
- महादेव मोरे, सामाजिक कार्यकर्ते