ठाणे जिल्ह्यातील सात शेतकरी परदेश दौऱ्यावर
शहापूर, ता. २९ (वार्ताहर) : परदेशातील अत्याधुनिक शेती तंत्रज्ञानाचा अभ्यास करून आपल्या शेतातील उत्पादन व उत्पन्न वाढवण्यासाठी कृषी विभागाने शेतकऱ्यांसाठी देशाबाहेर अभ्यास दौरा आयोजित केला आहे, परंतु या दौऱ्यासाठी ठाणे जिल्ह्यातून अवघ्या सहा शेतकऱ्यांना संधी मिळणार आहे. जिल्ह्यातील प्रत्येक तालुक्यातून एक शेतकरी याप्रमाणे फक्त सहा शेतकऱ्यांना ही परदेश दौऱ्याची संधी मिळणार आहे, तर संपूर्ण जिल्ह्यातून फक्त एक महिला शेतकऱ्याला या दौऱ्यात संधी देण्यात येणार आहे. या दौऱ्यासाठी बुधवारीपर्यंत (ता. ३०) प्रस्ताव सादर करण्याची अंतिम मुदत असून, मार्गदर्शनासाठी सोबतीला १० कृषी अधिकारी असणार आहेत.

दौऱ्यासाठी केंद्र अथवा राज्य पुरस्कारप्राप्त पीक स्पर्धा विजेते शेतकरी, तर राज्यस्तरीय समितीने शिफारस केलेल्या शेतकऱ्यांचा यात समावेश असणार आहे. या दृष्टीने ठाणे जिल्ह्याला सात शेतकऱ्यांचा लक्षांक देण्यात आला आहे. ही लक्षांक संख्या अल्प असल्याने तालुक्यातून अवघा एकच शेतकरी परदेश दौऱ्यावर जाऊ शकणार आहे. त्यामुळे शेतकरी नाराजी व्यक्त करीत आहेत. यासाठी विभागीय कृषी सहसंचालकामार्फत पुणे येथील कृषी आयुक्त कार्यालयात अर्ज पाठवावा लागणार आहे. यात वैयक्तिक, शेतीविषयक माहिती तसेच दौऱ्याचा तपशील द्यावा लागेल. अर्जातील माहिती तालुका कृषी अधिकारी यांच्याकडून प्रमाणित करणे अपेक्षित आहे. जिल्हास्तरीय समिती तथा जिल्हा अधीक्षक कृषी अधिकारी व सदस्य उपसंचालक तपासून त्यावर प्रतिस्वाक्षरी करणार आहेत.

दौऱ्यासाठी अत्यल्प लक्षांक दिल्याने शेतकऱ्यांमध्ये नाराजी आहे. प्रत्येक तालुक्याला अवघा एक असा लक्षांक देण्यात आला आहे. त्यामुळे शहापूर तालुक्यातूनदेखील फक्त एकच शेतकरी कृषीविषयक आभ्यासासाठी परदेशात जाऊ शकणार आहे.

शेत‌कऱ्यांना द्यावे लागेल हमीपत्र
मी यापूर्वी कोणत्याही शासकीय योजनेच्या अर्थसहाय्याने विदेश दौरा केलेला नाही. उत्पन्नाचे स्रोत व उपजीविका शेतीवरच अवलंबून आहे. कोणत्याही शासकीय, निमशासकीय, सहकारी, खासगी सेवेत नाही. तसेच वैद्यकीय क्षेत्रातील डॉक्टर, वकील, सीए, अभियंता, कंत्राटदार आदी व्यावसायिक नाही, असे स्वयंघोषणा व हमीपत्र शेतकऱ्यांना द्यावे लागणार आहे.

देशांना देता येईल पसंतीक्रम
• दौरा क्रमांक १ : युरोप (नेदरलँड, जर्मनी, स्वित्झर्लंड, फ्रान्स),
• दौरा क्रमांक २ : इस्रायल,
• दौरा क्रमांक ३ : चीन,
• दौरा क्रमांक ४ : जपान
• दौरा क्रमांक ५ : मलेशिया, व्हिएतनाम, फिलिपाइन्स
• दौरा क्रमांक ६ : दक्षिण कोरिया