ज्ञानदीप प्राथमिक शाळेत विद्यार्थी गुणगौरव सोहळा
नवी मुंबई (बातमीदार) ः ज्ञानदीप प्राथमिक शाळेत शैक्षणिक आणि करिअर उन्नतीसाठी विद्यार्थ्यांना प्रेरणा देणारा गुणगौरव सोहळा शनिवार, २६ जुलै रोजी मोठ्या उत्साहात पार पडला. या कार्यक्रमात विद्यार्थ्यांना स्पर्धा परीक्षा मार्गदर्शन शिबिराचे आयोजन करण्यात आले होते. कार्यक्रमाचे विशेष आकर्षण म्हणजे एनआरआय पोलिस ठाण्याचे वरिष्ठ पोलिस निरीक्षक सुनील कदम यांची उपस्थिती होती. त्यांनी विद्यार्थ्यांना स्पर्धा परीक्षांची तयारी कशी करावी, याबाबत अतिशय उपयुक्त आणि प्रेरणादायी मार्गदर्शन केले. त्यांच्याच हस्ते शाळेतील १०वी, १२वी मध्ये उल्लेखनीय यश मिळवणाऱ्या मराठी आणि इंग्रजी माध्यमातील विद्यार्थ्यांना तसेच एमपीएससी उत्तीर्ण प्रतिभा मोरे आणि माजी विद्यार्थी विधित मोरे यांना भावना फाउंडेशनतर्फे विशेष पारितोषिके प्रदान करण्यात आली.
कार्यक्रमात प्राथमिक विभागाचे मुख्याध्यापक बंकट तांडेल आणि इंग्रजी माध्यमाचे मुख्याध्यापक रत्नाकर तांडेल यांचीही उपस्थिती होती. कार्यक्रमाचे सूत्रसंचालन विजय हांडे यांनी केले, तर आभार प्रदर्शन हरेश तांडेल यांनी केले.