पामबीच मार्गावर डम्परची कारला धडक
नवी मुंबई, ता. २९ (वार्ताहर) : पामबीच मार्गावर नेरूळ येथे सोमवारी पहाटे आलिशान कारला भीषण अपघात झाल्याची दुर्घटना ताजी असतानाच मंगळवारी सकाळी (ता. २९) वाशीहून कोपरखैरणेच्या दिशेने जाणाऱ्या भरधाव डम्परने पामबीच मार्गावरील सत्रा फ्लाझा येथील चौकातून वाशीमध्ये जाणार कारला धडक घडली. या अपघातात कारमधील १२ वर्षीय मुलगा गंभीर जखमी झाला असून, त्याच्यावर उपचार सुरू आहेत. एपीएमसी पोलिसांनी याप्रकरणी डम्परचालकाविरोधात गुन्हा दाखल केला आहे.

वाशीतील कोपरी भागात राहणारे जगदीश लोहार (वय ३२) हे मंगळवारी सकाळी साडेसात वाजण्याच्या सुमारास कारने आपल्या मुलाला शाळेमध्ये सोडण्यासाठी निघाले होते. या वेळी ते पामबीच मार्गावरील सत्रा फ्लाझा येथील चौकातून उजवीकडे वळण घेऊन जात होते. याचवेळी वाशीकडून कोपरखैरणेच्या दिशेने जाणाऱ्या भरधाव डम्परने लोहार यांच्या कारला डाव्या बाजूला धडक दिली. त्यानंतर हा अनियंत्रित डम्पर रस्त्याच्या बाजूला असलेल्या झाडावर व त्यानंतर पाण्याच्या पाइपलाइनला धडकला. या अपघातात कारमधील लोहार यांचा मुलगा हिंमत (वय १२) याच्या डोक्याला गंभीर दुखापत झाली. त्याला वाशीतील एमजीएम रुग्णालयात उपचारार्थ दाखल करण्यात आले आहे. या अपघातात कार व डम्परचे नुकसान झाले आहे. एपीएमसी पोलिसांनी या अपघाताला जबाबदार असलेला डम्परचालक खय्यूम शेख (वय ३०) याच्याविरोधात गुन्हा दाखल करून पुढील कारवाई सुरू केली आहे.