दहावीच्या निकालात मुंबई सर्वांत तळाला
पुरवणी परीक्षेचा निकाल जाहीर

मुंबई, ता. २९ ः राज्य शिक्षण मंडळाच्या जून-जुलैमध्ये घेण्यात आलेल्या दहावी आणि बारावीच्या पुरवणी परीक्षांचे निकाल आज जाहीर झाले. यात दहावीचा निकाल राज्यात सर्वांत कमी १९.४२ टक्के इतका लागला आहे. तो मागील वर्षाच्या तुलनेत तब्बल सात टक्क्यांनी घटला आहे. बारावीच्या निकालात मात्र नऊ टक्क्यांनी वाढ होऊन तो ३४.५० टक्के इतका लागला आहे.
मुंबई विभागातून दहावीच्या परीक्षेला बसलेल्या नऊ हजार २२४ विद्यार्थ्यांपैकी केवळ एक हजार ९२ विद्यार्थी उत्तीर्ण झाले असून, एकूण निकाल १९.४२ टक्के लागला आहे. बारावीच्या परीक्षेला मुंबई विभागातून २० हजार ९६५ विद्यार्थ्यांनी नोंदणी केली होती. त्यापैकी सहा हजार २३६ विद्यार्थी उत्तीर्ण झाले असून, एकूण निकाल ३४.५० टक्के इतका आहे. मागील वर्षाच्या तुलनेत तो नऊ टक्क्यांनी वाढला आहे. दोन्ही परीक्षांतील विद्यार्थ्यांना आपल्या गुणपडताळणीसाठी ३० जुलै ते ८ ऑगस्टदरम्यान मंडळाकडे अर्ज करता येईल. तसेच सर्व विषयांसह प्रथम प्रविष्ट होऊन उत्तीर्ण झालेल्या विद्यार्थ्यांना त्यांची संपादणूक सुधारण्यासाठी श्रेणी, गुणसुधार योजनेचे लाभ फेब्रुवारी-मार्च २०२६ सोबत जून-जुलै २०२६मध्येही मिळणार आहेत.
...
राज्याचा एकूण निकाल
राज्य शिक्षण मंडळाच्या नऊ विभागीय मंडळांतून दहावीच्या परीक्षेला ३६ हजार ५७६ विद्यार्थी बसले होते. त्यापैकी १३ हजार ७०९ जण उत्तीर्ण झाले असून, एकूण निकाल ३६.४८ टक्क्के इतका आहे. बारावीला राज्यातून ७२ हजार ५५४ विद्यार्थी परीक्षेला बसले होते. त्यापैकी ३१ हजार ६७६ विद्यार्थी उत्तीर्ण झाले असून, एकूण निकाल ४३.६५ टक्के इतका आहे.
...
अकरावीसाठी प्रवेशाला पात्र
दहावीच्या पुरवणी परीक्षेत उत्तीर्ण झालेल्या विद्यार्थ्यांना राज्यात सुरू असलेल्या अकरावीच्या ऑनलाइन प्रवेश प्रक्रियेत संधी मिळणार आहे. यासाठी विभागाकडून राज्यभरातून उत्तीर्ण झालेल्या विद्यार्थ्यांच्या प्रवेशासाठी पाचव्या प्रवेश फेरीपासून संधी दिली जाणार असल्याचे विभागाकडून सांगण्यात आले. तसेच यात एटीकेटीचा लाभ असलेल्या विद्यार्थ्यांचा समावेश आहे. बारावीत उत्तीर्ण झालेल्यांना पदवी आणि इतर व्यावसायिक अभ्यासक्रमांच्या प्रवेशासाठी विभागाकडून प्रक्रिया केली जाण्याची शक्यता आहे.