अलिबाग, ता. ३० (वार्ताहर)ः गोपाळकाळा जवळ आल्याने गोविंदा पथकांचा जोरदार सराव सुरू झाला आहे. पावसाच्या धारा अंगावर झेलत गेविंदा रे गोपाळा...च्या सुरात थरावर थर रचण्याची चढाओढ गल्लोगल्ली रंगू लागली आहे.
जिल्ह्यात ४० पेक्षा अधिक पथके कार्यरत आहेत. गुरुपौर्णिमेच्या दिवशी गोविंदा पथकांनी सरावास सुरुवात केली. सरावासाठी अधिक दिवस मिळाल्याने गोविंदामध्ये उत्साह संचारला आहे. चांगला सराव करता येईल, म्हणून गोविंदा पथकांची तालिम सुरू झाली आहे. पथकातील गोविंदांच्या आरोग्याची काळजी घेण्यासाठी विमा करणे आवश्यक आहे. प्रत्येक गोविंदाने वैद्यकीय तपासणी करणे अत्यावश्यक आहे, असे ॲड. मानसी म्हात्रे यांनी सांगितले, तर गोंधळपाडा येथील गावदेवी गोविंदा पथकाचे प्रसाद गोतावडे यांनी राजकारण बाजूला ठेवूनच पथकात सहभागी व्हावे, असे आमच्या मंडळाकडून सांगितले जात आहे. यंदा सरावासाठी उत्तम काळ मिळाला आहे. सध्या सात थरांचा सराव पूर्ण झाला असून, आठव्या थराचा सराव सुरू आहे.
-------------------------------------
राजकीय पक्षांमुळे स्पर्धा
दहीहंडी उत्सवात राजकीय पक्षांमध्येच स्पर्धा लागली आहे. त्यामुळे छोट्या दहीहंडी पथकातील इच्छुक गोविंदांना मोठ्या गोविंदा पथकांकडून समाविष्ट करण्याचा प्रयत्न सुरू आहे. ‘गोविंदा रे गोपाळा’, असा जयघोष करीत पथके सरावाला लागली आहेत.