काकीने दिली पुतण्याला मारण्याची सुपारी

वाडा, ता. ३० (बातमीदार) : शहरातील आगर आळी या भागात राहणारा ऋषिकेश मनोरे याच्यावर २० जुलै रोजी अज्ञात हल्लेखोरांनी रात्री साडेआठ वाजण्याच्या सुमारास डोळ्यात मिरचीपूड टाकून धारदार शस्त्राने हल्ला केला होता. या हल्ल्यात गंभीर जखमी झालेल्या ऋषिकेशला वाडा ग्रामीण रुग्णालयात उपचारासाठी दाखल करण्यात आले. तेथून पुढील उपचारासाठी त्याला ठाण्यातील खासगी रुग्णालयात हलविण्यात आले. यामध्ये हल्लेखोरांनी ऋषिकेशची दुचाकी व मोबाईल घेऊन घटनास्थळावरून पळ काढला होता. त्यानंतर पोलिसांनी अवघ्या नऊ दिवसांत या गुन्ह्याचा उलगडा केला असून, तीन आरोपींना अटक केली आहे.

सुशांत चिडे, तुषार मनवर, यश करंजे अशी अटक आरोपींची नावे आहेत. वाडा पोलिसांनी शहरातील सीसीटीव्ही फुटेज तपासणी करून तसेच ऋषिकेशच्या मोबाईलचे लोकेशन तसेच तांत्रिक तपास केला असता, आरोपी नांदगाव, नाशिक येथे असल्याची माहिती प्राप्त झाली. त्यानंतर पोलिस पथकाने नाशिक येथून आरोपींना जेरबंद केले. चौकशीत आरोपींनी गुन्ह्याची कबुली दिली. यामध्ये ऋषिकेशची काकी राधिका मनोरे ऊर्फ राधिका जाधव यांनी एक लाख रुपयांची सुपारी दिल्याचे सांगितले. पोलिस राधिका हिचा शोध घेत आहेत. कौटुंबिक वादातून राधिकाने ही सुपारी दिल्याचे निष्पन्न झाले आहे.