मध्य रेल्वेचा खोळंबा
वांगणी-बदलापूरदरम्यान रुळाला तडा; तासभर वाहतूक ठप्प

बदलापूर, ता. ३० (बातमीदार) : वांगणी-बदलापूर रेल्वेस्थानकादरम्यान रुळाला तडा गेल्याने बुधवारी (ता. ३०) सकाळी आठ वाजल्याच्या सुमारास मध्य रेल्वेची वाहतूक खोळबंली. या बिघाडामुळे बदलापूरहून कर्जत-खोपोलीच्या दिशेने जाणारी आणि कर्जतहून मुंबईच्या दिशेने येणारी रेल्वे वाहतूक विस्कळित झाली. सकाळी ऐन गर्दीच्या वेळी हा प्रकार घडल्याने खोपोली ते बदलापूर स्थानकातील प्रवासी संंतप्त झाले तसेच स्थानकांवर मोठी गर्दी उसळली.

वांगणी ते बदलापूरदरम्यान रेल्वे रुळाला तडा गेल्याची माहिती रेल्वे प्रशासनाला मिळताच ही समस्या सोडवण्यासाठी तांत्रिक पथकाने घटनास्थळी धाव घेत युद्धपातळीवर काम सुरू केले. मात्र सकाळी ऐन गर्दीच्या वेळी हा प्रकार घडल्याने बदलापूर स्थानकात फलाट क्रमांक २वर कर्जतच्या दिशेने जाणाऱ्या प्रवाशांचा खोळंबा झाला. कर्जत-खोपोलीच्या दिशेने एकही लोकल जाऊ न शकल्यामुळे पुढे खोपोली कर्जतहून मुंबईच्या दिशेने येणारी लोकल सेवा ठप्प झाली. या वेळी संतप्त झालेल्या प्रवाशांनी बदलापूर स्थानकातील फलाट क्रमांक ३वरील स्टेशन मास्तरांना घेराव घातला. आधीच बदलापूरसारख्या गर्दीच्या स्थानकावर लोकल फेऱ्या कमी असताना, सकाळीच फलाट क्रमांक ३वरून एकही लोकल मुंबईच्या दिशेने जात नसल्यामुळे प्रवाशांनी तीव्र नाराजी व्यक्त केली. दरम्यान, पाऊण तासाच्या खोळंब्यानंतर रेल्वे रुळाच्या दुरुस्तीचे काम करण्यात आले. त्यानंतर या मार्गावरील सेवा सुरळीत करण्यात आली.

सिंहगड एक्स्प्रेसला सर्व स्थानकांवर थांबा
रेल्वे रुळाच्या दुरुस्तीनंतर सुरू होणाऱ्या लोकल सेवेवर गर्दीचा ताण पडू नये, म्हणून पुण्याहून मुंबईच्या दिशेला जाणाऱ्या सिंहगड एक्स्प्रेसला कर्जत ते बदलापूरदरम्यान सर्व स्थानकांवर थांबा देण्यात आला. मात्र या बिघाडामुळे कर्मचाऱ्यांना लेट मार्क लागला. मध्य रेल्वेच्या या नेहमीच्या त्रासावर अनेकांनी आपली नाराजी व्यक्त केली.