खड्ड्यांमुळे तरुणाचा मृत्यू
भिवंडी-वाडा मार्गावर संतप्त ग्रामस्थांचा रास्ता रोको

भिवंडी, ता. ३० (वार्ताहर) ः भिवंडी-वाडा मार्गावर खड्ड्यांमुळे एकाचा मृत्यू झाल्याची घटना घडली आहे. यश राजेश मोरे (वय १८) असे मृताचे नाव आहे. बुधवारी (ता. ३०) सायंकाळी यशचा मृतदेह घरी आणला असता संतप्त नागरिकांनी मृतदेह असलेली रुग्णवाहिका रस्त्यावर आडवी उभी करून या खड्ड्यांविरोधात रास्ता रोको आंदोलन केले व या खड्ड्यांना जबाबदार कंत्राटदार व अधिकाऱ्यांच्या विरोधात गुन्हा दाखल करण्याची मागणी केली.

मडक्याचा पाडा येथे राहणारा यश मोरे व त्याचा मित्र यश बालाजी घुटे हे दोघे रविवारी (ता. २०) सकाळी व्यायाम करण्यासाठी कवाड येथील व्यायामशाळेत जात होते. याच वेळी रस्त्यावरील खड्ड्यांमुळे त्यांची दुचाकी खड्ड्यात आदळून दोघेजण खाली पडले. यामध्ये दोघे गंभीर जखमी झाले. या दोघांवर ठाण्यातील एका खासगी रुग्णालयात उपचार सुरू होते; मात्र दहा दिवसांच्या उपचारानंतर यश मोरे याचा बुधवारी (ता. ३०) सकाळी मृत्यू झाला. या घटनेची माहिती मिळताच संपूर्ण परिसरात शोककळा पसरली. सायंकाळी यशचा मृतदेह घरी अंत्यसंस्कारासाठी घेऊन आले असता मडक्याच्या पाडा येथे जमा झालेले कुटुंबीय, नातेवाईक व ग्रामस्थांनी खड्ड्यांमुळे आपल्या मुलाचा जीव गेल्याने सांगत रास्ता रोको आंदोलन सुरू केले. सायंकाळी ऐन गर्दीच्या वेळी रास्ता रोको आंदोलन केल्याने या मार्गावरील वाहतूक तब्बल दोन तास ठप्प झाली होती. परिणामी, या मार्गावर मोठी वाहतूक कोंडी झाली. त्याचा फटका घरी जाणाऱ्या चाकरमानी व विद्यार्थ्यांना बसला. या रास्ता रोको आंदोलनामुळे भिवंडी-वाडा मार्गाच्या दोन्ही वाहिनींवर सुमारे पाच किलोमीटरपर्यंत वाहनांच्या रांगा लागल्या होत्या. आंदोलन स्थगित केल्यानंतर या मार्गावरील वाहतूक स्थानिक पोलिसांनी सुरळीत केली.

पोलिसांकडून कारवाईचे आश्‍वासन
भिवंडी-वाडा मार्गावरील खड्ड्यांना व त्यामुळे होणाऱ्या अपघातांना जबाबदार असणारे कंत्राटदार व अधिकाऱ्यांवर सदोष मनुष्यवधाचा गुन्हा दाखल होत नाही, तोपर्यंत यशच्या मृतदेहावर अंत्यसंस्कार करणार नाही, अशी भूमिका यशचे वडील राजेश मोरे यांनी घेतली होती. या आंदोलनांची माहिती मिळताच पोलिस उपअधीक्षक राहुल झालटे, तालुका पोलिस ठाण्याचे वरिष्ठ पोलिस निरीक्षक हर्षवर्धन बारवे, स्थानिक गुन्हे शाखेचे सुरेश मनोरे हे पोलिस फौजफाट्यासह घटनास्थळी दाखल झाले व त्यांनी आंदोलकांची समजूत काढत योग्य ती कारवाई करण्याचे आश्‍वासन दिले. या आश्‍वासनानंतर ग्रामस्थांनी आंदोलन मागे घेतले व यशचा मृतदेह घरी नेला.