पोलिसांसोबत तृतीयपंथींची झटापट
अतिक्रमण पाडण्यासाठी गेलेल्या पथकाच्या कामात अडथळा

नवी मुंबई, ता. ३० (वार्ताहर) : रबाळे पोलिस ठाण्यासमोरील मोकळ्या जागेवरील अतिक्रमण पाडण्यासाठी गेलेले महापालिकेचे कर्मचारी व पोलिसांसोबत तृतीयपंथींनी अश्लील हावभाव व झटापट करून कारवाई रोखण्याचा प्रयत्न केल्याची घटना मंगळवारी (ता. २९) सायंकाळी घडली. या तृतीयपंथींनी पोलिसांनी ताब्यात घेतल्यानंतरदेखील त्यांनी पोलिस ठाण्यात हुज्जत घालून, गैरवर्तन करून गोंधळ घातला. या प्रकारानंतर पोलिसांनी पाच तृतीयपंथींविरोधात सरकारी कामात अडथळा निर्माण केल्याप्रकरणी गुन्हा दाखल करून त्यांना ताब्यात घेतले आहे.

रबाळे पोलिस स्थानकासमोरील मोकळ्या जागेवर दहा ते बारा तृतीयपंथींनी अतिक्रमण करून त्याठिकाणी मंदिर उभारण्यास सुरुवात केली होती. या अतिक्रमणावर कारवाई करण्यासाठी मंगळवारी सायंकाळी महापालिका घणसोली विभाग कार्यालयाचे विभाग अधिकारी उत्तम खरात व अतिक्रमण विभागाचे पथक गेले होते. या वेळी पालिकेच्या पथकाने तृतीयपंथींना त्या ठिकाणावरून निघून जाण्याबाबत सांगितले; मात्र तृतीयपंथींनी आक्रमक भूमिका घेत गोंधळ घातला. अश्लील हावभाव करून पोलिस व महापालिकेच्या कर्मचाऱ्यांशी झटापट करून रस्ता अडवून ठेवला. त्यामुळे पोलिसांनी सौम्य बळाचा वापर करून अर्चना संतोष पाठक (वय २६), तिया नाईक (२०), अक्षता गुरू (२३), आकांक्षा पाटील (२४), प्रिया त्रिपाठी (३२) या पाच तृतीयपंथींना ताब्यात घेऊन पोलिस स्थानकात आणले; मात्र याठिकाणीही आरोपींनी महिला पोलिसांना शिवीगाळ करून त्रास दिला. या घटनेत काही पोलिस कर्मचारी व महिलांना किरकोळ दुखापत झाली आहे. त्यानंतर पोलिसांनी या सर्वांविरोधात गुन्हा दाखल केला आहे. त्यानंतर त्यांना नोटीस बजावून सोडून देण्यात आल्याची माहिती पोलिसांनी दिली.