नालासोपारा स्थानकावर नवीन एलिव्हेटेड डेक
प्रवाशांच्या सोयीसाठी मोठा दिलासा
सकाळ वृत्तसेवा
मुंबई, ता. ३० ः पश्चिम रेल्वे मार्गावरील नालासोपारा स्थानकावरील फलाट क्रमांक एकवरील ९५ मीटर लांब व ११.५ मीटर रुंद अशा एलिव्हेटेड डेकचे काम पूर्ण होऊन तो प्रवाशांच्या वापरासाठी कार्यान्वित करण्यात आला आहे. हा डेक स्थानकाच्या दक्षिण टोकावरील दोन पादचारी पुलांना  जोडतो.
मुंबई रेल्वे विकास निगमतर्फे (एमआरव्हीसी) राबवण्यात येणाऱ्या स्थानक सुधारणा प्रकल्पांतर्गत हा महत्त्वाचा टप्पा पूर्ण करण्यात आला आहे. या डेकमुळे फलाटावरील गर्दीचे व्यवस्थापन अधिक सुकर होणार असून, प्रवाशांना चालण्यासाठी अधिक मोकळी जागा उपलब्ध होणार आहे. नालासोपारा स्थानक हे विरार-चर्चगेट लोकल मार्गावरील एक प्रमुख आणि वर्दळीचे स्थानक असून, येथे दररोज हजारो प्रवासी प्रवास करतात. या डेकच्या उभारणीमुळे प्रवाशांच्या सोयींमध्ये वाढ होणार आहे, असे रेल्वे प्रशासनाने सांगितले. या एलिव्हेटेड डेकच्या माध्यमातून प्रवाशांना फलाटावर गतीने हालचाल करता येणार असून, गर्दीच्या वेळेत होणाऱ्या अडथळ्यांमध्ये मोठी घट होईल, असा विश्वास व्यक्त करण्यात येत आहे. रेल्वेस्थानकांच्या आधुनिकतेच्या दिशेने हा एक महत्त्वपूर्ण टप्पा असल्याचेही एमआरव्हीसीने स्पष्ट केले.