सानपाडा स्थानक परिसरात खड्डे
प्रवासी, वाहनचालक त्रस्त; वाहनांचे होतेय मोठे नुकसान
जुईनगर, ता. ५ (बातमीदार) : सानपाडा रेल्वेस्थानकाच्या परिसरात रस्त्यांची दयनीय अवस्था झाली आहे. ठिकठिकाणी मोठे खड्डे निर्माण झाल्याने प्रवाशांना तसेच वाहनचालकांना नाहक त्रास सहन करावा लागत आहे. पावसाळ्यात हे खड्डे अधिकच खोल व धोकादायक झाले आहेत. परिणामी, चारचाकी वाहने खिळखिळी होत असून दुचाकीस्वार व रिक्षाचालकांना पाठदुखीचा त्रास जाणवू लागला आहे.
सानपाडा रेल्वेस्थानक सायन-पनवेल महामार्गालगत असून, उड्डाणपुलाखालील रस्त्यांचे काही प्रमाणात काँक्रीटीकरण झाले आहे; परंतु डांबरी व काँक्रीट रस्त्यामधील योग्य दुवा न साधल्याने कडेला मोठ्या खड्ड्यांची रचना झाली आहे. तसेच स्थानक परिसरातील रिक्षा व बसथांब्यांवरही खड्ड्यांचे साम्राज्य पसरले असून, प्रवाशांना रिक्षातून उतरतानाही सावधगिरी बाळगावी लागत आहे.
या मार्गाचा वापर तुर्भे एपीएमसी मार्केट, जनता मार्केट, तुर्भे स्टोअर व एमआयडीसीमधील कामगार मोठ्या प्रमाणात करतात. हे सर्वजण सानपाडा स्थानकावर उतरल्यावर बस किंवा रिक्षाने पुढे प्रवास करतात; मात्र या रस्त्यांवरील खड्ड्यांमुळे प्रवास जीवघेणा ठरू लागला आहे. प्रवाशांमध्ये नाराजीचा सूर असून, वारंवार तक्रारी करूनही परिस्थितीत फारसा फरक झालेला नाही.
एपीएमसीतून मुंबई व उपनगरांमध्ये फळे व भाजीपाला वाहून नेणाऱ्या टेम्पोचालकांचाही त्रास वाढला आहे. माझा टेम्पो या मार्गावरून दररोज जातो. खड्ड्यांमुळे गाडीचे मोठे नुकसान होते. महागाईमुळे दुरुस्ती खर्च प्रचंड वाढला आहे, अशी खंत टेम्पोचालक शिवाजी पाटील यांनी व्यक्त केली.