माणगाव, ता.४(बातमीदार)ः तालुक्यातील कशेणे गावात बिबट्याचा वावर असल्याने ग्रामस्थांमध्ये भीतीचे वातावरण आहे. अशातच रविवारी (ता.३) सीसीटिव्हीत पुन्हा बिबट्या दिसल्याने सणासुदीच्या काळातच ग्रामस्थांची झोप उडाली आहे.
कशेणे गावात रात्रीच्या वेळी भक्षाच्या शोधात बिबट्या फिरताना दिसत आहे. गावातील जनावरांचे अस्तित्व धोक्यात आले आहे. पण सणासुदीच्या काळात गावात बाहेरगावाहून येणाऱ्या लोकांची संख्याही मोठी असते. त्यामुळे लहान मुले, महिला यांचा वावर रात्री अधिक असणार असून, एखादी गंभीर घटना घडण्याची शक्यता नाकारता येत नाही.
------------------------------
वनविभागाचे दुर्लक्ष
बिबट्याचा वावर सीसीटीव्हीत वांरवार दिसत आहे. अनेक वेळा ग्रामस्थांनी वनविभागाकडे तक्रारी नोंदवल्या होत्या. मात्र कोणतीही ठोस कारवाई केलेली नाही. त्यामुळे ग्रामस्थांमध्ये नाराजी आहे.
------------------------------------
ग्रामस्थांच्या मागण्या
- बिबट्याच्या हालचालींवर विशेष लक्ष ठेवा.
- तातडीने पिंजरे लावावेत.
- रात्रीची गस्त वाढवावी.
- वनविभागाने तत्काळ कारवाई करावी.