कल्याणमध्ये बाल कलाविष्कार
कल्याण, ता. ६ (वार्ताहर) : मराठी बालनाट्य दिवसानिमित्त बालरंगभूमी परिषद कल्याण शाखेच्या वतीने नाट्यछटा, एकपात्री असा बाल कलाविष्कार, तसेच बालनाट्य स्पर्धेतील पुरस्कारप्राप्त बालकलाकार आणि बालनाट्य संस्थांचा गुणगौरव सोहळा पार पडला. या वेळी बालनाट्य चळवळीतील ज्येष्ठ रंगकर्मी अंबादास जोशी यांचा सन्मान आणि पुस्तकाचे प्रकाशन करण्यात आले.

बालरंगभूमी परिषद कल्याण शाखेच्या वतीने शनिवारी (ता. २) मराठी बालनाट्य दिवसानिमित्त नाट्यछटा, एकपात्री अभिनय, स्कीट अशा बाल कलाविष्कारांचे आयोजन केले होते. अनेक बालकलाकारांनी आपली कला सादर करत प्रेक्षकांची मने जिंकली. तसेच बालनाट्य चळवळीतील ज्येष्ठ रंगकर्मी अंबादास जोशी यांचा शाल, श्रीफळ, पुष्पगुच्छ व सन्मानपत्र देऊन सन्मान करण्यात आला. या वेळी बालनाट्य स्पर्धेतील पुरस्कारप्राप्त केलेल्या बालकलावंतांना तसेच बालनाट्य संस्थांना सन्मानचिन्ह आणि प्रशस्तिपत्र करून गौरविण्यात आले. तसेच बालनाट्य चळवळ अविरत जोपासणाऱ्या अनेक मान्यवर कलाकारांचा गुणगौरवदेखील बालरंगभूमी परिषद कल्याण शाखेच्या वतीने करण्यात आला. कार्यक्रमाला ज्येष्ठ रंगकर्मी अंबादास जोशी, अभिनेते प्रभाकर मोरे, शालेय समिती अध्यक्ष राधाकृष्ण पाठक, मुख्याध्यापक ज्ञानेश्वर मेटकरी, सुभेदार वाडा प्राथमिक शाळेच्या मुख्याधापिका कल्पना पोतदार, प्रवास वर्णन लेखक प्रवीण कारखानीस, अखिल भारतीय मराठी नाट्य परिषद कल्याण शाखा अध्यक्ष रवींद्र सावंत, कोशाध्यक्ष हेमंत यादगिरे, बालरंगभूमी परिषद कल्याण शाखेच्या अध्यक्षा सुजाता डांगे, प्रमुख कार्यवाह शिवाजी शिंदे, उपाध्यक्ष संजय गावडे आदी मान्यवरांच्या हस्ते नटराज पूजन व दीपप्रज्वलन करून कार्यक्रमाची सुरुवात करण्यात आली.

कार्यक्रमाचे प्रास्ताविक बालरंगभूमी परिषद कल्याण शाखेचे प्रमुख कार्यवाह शिवाजी शिंदे यांनी केले. मराठी बालनाट्य दिवसाचे औचित्य साधून ज्येष्ठ नागरिक लेखक, साहित्यिक वसंत काल्हापुरे यांच्या माझे देश-विदेश पर्यटन या त्यांच्या चौथ्या पुस्तकाचे प्रकाशन करण्यात आले.